EDITORYAL -  Cash gifts sa senior citizens

Dako kaayo ang kalipay sa mga senior citizen nga nakaabot sa edad nga 80 o umaabot pa sa maong edad nunot sa pagpirma na ni Presidente Ferdinand Marcos Jr. sa Centenarian Act.

Kay sa maong balaod, ang mga senior citizens nga makaabot sa maong edad, 80, 85 ug 95 dunay madawat nga P10 mil nga cash gift gikan sa gobiyerno sa adlaw nilang natawhan. Gikan sa edad nga 80, kada lima ka tuig makadawat sila og tag P10 mil matag birthday.

Samtang kadtong mga makaabot sa edad nga 100-anyos, bisan toa pa sila sa abroad o naa dinhi sa Pilipinas hatagan sab og P100 mil nga cash gift.

Matud pa sa National Commission of Senior Citizens (NCSC) ang maong balaod miila sa paningkamot sa maong mga senior citizen nga magpabiling himsog aron motaas ang kinabuhi.

Ang amahan sa maong balaudnon mao si Senador Ramon Revilla Jr. miingon nga tumong sa maong balaod nga pahalipayan ang mga senior citizens.

Angay hinumdoman nga ang mga senior citizens karon dako og natampo sa kung unsa ang nasud karon. Apil niini ang paghulma sa hunahuna sa mga kabataan ug sa mga hamtong na karon nga nahimong instrumento sa paglambo sa nasud.

Subo pamalandungon nga daghan sa mga senior citizens nga napasagdan nalang karon tungod sa kakabus sa ilang mga pamilya.

Bisan tuod og adunay gidawat nga binuwang ayuda ang mga senior citizens nga na-edad sugod og 60-anyos gikan sa mga lokal nga pangamhanan, kuwang pa kini para sa ilang panginahanglan ilabi na ang kadaghanan kanila wala nay panginabuhi ug duna nay daghang gipamati sa lawas.