EDITORYAL - Ready na sa El Niño?

Hinayhinay nang nabatyagan sa pipila ka bahin sa Pilipinas ang negatibong epekto sa agrikultura sa El Niño Phenomenon bisan sa pipila ka semanang dag-om sa kalangitan nga dunay dalang hangin ug pag-uwan epekto sa amihan.

Sa San Miguel, Bulacan didto sa Luzon, ubay-ubay na nga kahumayan ang naughan sa tubig ug nangliki ang yuta tungod sa huwaw o El Niño. Nangayo na karon og tabang sa gobiyerno ang mga mag-uuma aron masalbar ang ilang mga humay nga wala pa maani.

Dinhi sa Kabisay-an, mora og kampante pa ang tanan, apil na ang mga LGUs nunot sa nasinating pagsige og dag-om sa kalangitan ug pagsige sab og uwan-uwan ilabi na sa kabukiran.

Ang PAGASA miingon nga ang kinakusgang hunat sa El Niño mabatyagan sa Abril hangtud tungatungang bahin sa tuig 2024.

Medyo layo-layo pa, duna pay Marso. Apan ang sunod buwan kuwangon kaayo aron gyud maandam ang mga mag-uuma, ilabi na nga ang uban nakatisok na og bag-ong pananom unya kuyaw nga tungatunga sa pagtubo niini kalit unyang mograbe ang kainit sa panahon.

Unsa namay gihimo sa nagkadaiyang lokal nga buhatan sa agrikultura sa mga local government units sa Sugbo? Naandam na ba ang mga baril sa tubig, tubo sa tubig, tinubdan sa tubig ug water pipes padung sa kaumahan?

Duna na bay mga alternatibong binhi nga makasugakod sa ting-init nga ikahatag dayon ngadto sa mga mag-uuma? Duna na bay pundong gigahin para sa dinaliang ayuda kun pananglit walay maani ang mga mag-uuma kay nangamatay tungod sa huwaw?

Dili na unta paaboton pa sa mga LGUs nga motiyabaw ang mga mag-uuma kay bisan moaksyon sila, uwahi na kini, di na masalbar ang mga pananom, ilabi na nga pwerteng hinaya molihok sa mga gitahasan pagpagawas anang pundo tungod sa burukrasya ug pamolitika.