Kay wa man kakuha og suporta ang iyang mga hudlat sa kudeta ug pagbuwag sa Mindanao gikan sa republika, si kanhi Presidente Rodrigo Duterte niusab sa iyang baruganan atol sa rally sa Cebu City niadtong Domingo:
Human tawga si Marcos nga bangag ug adik sa rally sa Davao sa niaging buwan, si Duterte niingon nga way dagkong sayop ang presidente mao nga iyang suportahan; ug
Human supaka ang charter change kay way sayop ang 1987 Constitution, si Duterte uyon na sa cha-cha basta di lang molugway sa termino ni Marcos.
* * *
Laing timaan nga ang mga Duterte mahimo nga di na makigbangga sa mga Marcos mao ang pagtangtang sa social media accounts ni Bise Presidente Sara Duterte sa iyang mensahe nga nagpasidungog sa isog nga mga Pilipino nga nibarug para sa katarung atol sa Edsa People Power Revolution sa 1986.
Ambot gitawag ba sa Malakanyang ang iyang atensiyon, o siyay nakaamgo nga ang iyang pagpasidungog sa mga nipalayas sa diktadura nisukwahi sa pagdumili ni Marcos pagdeklarar og holiday sa Pebrero 25, gi-delete ang mensahe human lang sa pipila ka oras.
* * *
Pero ang pagpa-upoy-upoy sa mga Duterte, imbes makasalbar sa UniTeam, mahimo hinuon nga makapakumbinser ni Marcos nga laos na ang mga Duterte:
· Ang gidak-on sa rally sa SRP niadtong Domingo wa ra sa kumingking sa kabaga sa mga rally sa samang lugar sa kanhi presidente niadtong 2016 ug sa UniTeam niadtong 2022; ug
· Way lokal nga opisyal sa Sugbo nga nagpakita gawas ni Cebu City Mayor Mike Rama nga mas nidayeg ni Marcos kay sa mga Duterte.
* * *
Kon sinabotan sa mga Duterte ang pakigsuod og balik sa administrasyon, nakalimtan nila og sulti si Davao City Mayor Sebastian Duterte kinsa:
· Nihulagway nga kinadak-an nga scam ang saad ni Marcos pagpaubos sa presyo sa bugas humay ngadto sa P20 kada kilo pero niburot hinuon ngadto sa P50 ngadto sa P60 sa kamerkadohan; ug
· Gihagit niya og pustaanay nga P1,500 si House Speaker Martin Romualdez, nga iyang ginganlan og “baboy,” “gago,” “tambaloslos” ug “yawa,” nga di na butangan og ngan ug nawong ang mga hinabang sa mga biktima sa sunod nga baha ug sunog.
* * *