EDITORYAL - Mga abusadong drayber sa taksi wala na mapitol

Dunay mga pasaherong nangreklamo batok aning mga drayber sa taksi nga dili mogamit sa ilang metrohan. Ang mga nangreklamo pinaagi sa social media mga pasahero sa inter-island nga mga barko diha sa Pier Area.

Kaning mga taksi nakatimaan unsang orasa modunggo ang mga barko mao nga 30 minutos sa dili pa modunggo, maglinya na sila diha sa ganghaan sa mga pantalan aron makakuha og pasahero.

Apan matud pa sa mireklamo nga gi-post niini sa social media, dili gusto sa mga drayber nga mag metrohan kay pakyaw gyud. Ang nakapait, tanang drayber sa taksi nga naglinya pulos ingon niana og tubag, pakyaw gyud kay mao na kunoy “patakaran.”

Ang nakabati og samot, basta kuno foreigner ang mosakay mas taas ilang rate o pangayo. Dili ba kini pakauwaw sa nasud? Pwerteng paningkamot sa Department of Tourism nga ibaligya ang Pilipinas ngadto sa mga turista, unya mao ni ilang masinati dinhi?

Mao diay nga dunay mga vloggers nga mga langyaw nga duna gyuy pasupot pahimangno sa ilang mga kaparehas nga turista nga kung moanhi sa Pilipinas kinahanglang magmatngon sa mga abusadong taxi drivers kay huthotan gyud sila og maayo.

Kinsa may naghatag nila og pagtugot nga makapamasahero dili ba ang Land Transportation Franchising and Regulatory Board, mao diay naa sa ilang prangkisa, pakyawan? Kung mao na, mas maayo pang wala nalang silay metrohan para mura sila og kolurom.

Atong panawagan ang atensyon sa LTFRB, ang Land Transportation Office-7, ang Highway Patrol Group-7 nga adtuon kining mga taksi diha sa Pier Area kay murag nigara na sila kay walay regular nga namadlong kanila.

Kung ingon niana ang kinaiya sa mga drayber, dili sila makatabang sa pag-promote sa Pilipinas ngadto sa mga langyaw nga bisita. Sa pagkanaog palang nila sa pantalan, masugamak na dayon og mangingilad, maayo kaha na?

Patay ang turismo kung mao na ilang ginahimo kada adlaw.