Dul-an sa duha ka semana na human gipakita sa National Museum of the Philippines (NMP) ang kinawat nga pulpit panels sa simbahan sa Boljoon sa habagatang Sugbo, wa pay timaan nga mataod sila pagbalik sa mga pulpito sa Archdiocesan Shrine of Patrocinio de Maria Santisima.
Magkadugay nga mangiyugpos ang NMP sa sibaw nga mga demanda sa pag-uli sa kabtangan ngadto sa tinuod nga tag-iya magkalisod duphan ang ilang pangangkon nga apil na sila sa pagpanag-iya ug nga mas takos sila nga mo-preserbar sa panels para sa umaabot nga mga henerasyon.
* * *
Kay giisnab man sa NMP ang mga pakisayod ni Max Limpag ug ubang mga sakop sa media tipigan o i-uli ba nila ang panels sa Boljoon, mas dako ang kahigayonan nga makuhaan og dugang kasayuran ang magtiayong Edwin ug Aileen Bautista, nga maoy ni-donar sa kabtangan ngadto sa NMP.
Ang mga Bautista nga gihulagway sa ilang mga higala nga “purchaser in good faith,” ug gipanalipdan sa NMP nga ethical nga nangolekta ug lehitimo nga nanag-iya sa panels wa motago sa media. Nga ila ra hinuong gipasa ngadto sa NMP.
* * *
Makatabang ang mga Bautista pagtukas sa misteryo kon i-boluntaryo ang mosunod nga kasayuran:
• Kanus-a napalit ang panels, kinsa ang gipalitan ug pila ang bayad (aron makumparar sa presyo nga gitakda sa imbentaryo sa simbahan);
• Mas maayo kon may mapakita nga resibo sa transaksiyon (nga makatabang sa BIR pagsusi nabayran ba ang saktong buhis); ug
• Nahibawo ba silang kinawat ang panels gikan sa simbahan (kay ang ethical collector mohimo sa batakang pakisusi) ug kon nahibawo nganong gipalit man?
* * *
Kon motabang sa imbestigasyon ang mga Bautista mahimong masubay kapila na mabalhin ang pagpanag-iya, kinsa ang orihinal nga nipalit sa kinawat ug tinuod bang pari sa Boljoon maoy ilegal nga nibaligya.
Ang pait nga kamatuoran mao nga silang Bautista, nangaging mga tag-iya ug NMP di ganahang mogapos sa ilang liog. Kay natambagan na sa mga abogado, nga ang good faith sa pagtipig og kinawat di makasagang sa Anti-Fencing Law (PD 1612) kansang Section 5 nagkanayon: “Mere possession of anything of value which has been the subject of robbery or thievery shall be prima facie evidence of fencing.”
* * *