Bus Rapid Transit

Husto ang awhag ni Cebu City Councilor James Cuenco nga dili usa ipadayon ang Phase 2, Phase 3 ug ang Phase 4, sa Bus Rapid Transit dinhi sa Dakbayan sa Sugbo kon dili pa mahuman ang karsada gikan sa Guadalape paingon sa Lahug.

Dunay aprobado na nga infrastructure project nga paghimo og karsada nga magsukad sa Guadalupe, agi sa Barangay Kalunasan ug ang karsada molapos sa kilid sa University of Cebu sa Lahug.

Ang katuyoan niini aron nga ang mga motorista dunay karsada nga kaagian kon gikan sila sa Lahug ug mipaingon sa south, ug kadtong gikan sa south nga mopaingon sa northern barangays.

Gawas pa niini, duna pa gani giplanong karsada nga anha mag-agi kilid sa kabukiran sa Dakbayan sa Sugbo, apan unsaon nga hinay kaayo ang national government sa pagpatuman niining mao nga proyekto.

Ang Phase 2 sa BRT project, nga mao ang paghimo og exclusive lane sa Escario Street gikan sa atubangan sa Provincial Capitol paingon na sa Gorordo, makahatag na usab og kaguliyang sa mga sakyanan.

Timan-i nga ang Escario Street mas gamay pa nga karsada kay sa Osmeña Boulevard. Four lanes ra ang Escario Street samtang six lanes ang Osmeña Boulevard, apan naproblema gani gihapon tungod sa BRT project.

Kini pa maoy timan-i, ayaw pagdahom nga duha ra ka lane sa karsada ang gamiton sa BRT, kay nakita na nato nga diha sa Osmeña Boulevard ug sa Natalio Bacalso Avenue, duna gani bahin sa karsada nga upat ka lanes ang ilang gigamit.

Ang mga nagpasiugda sa BRT kaniadto, kusog kaayong moaleloya sa maong proyekto, ug padayong nagpatuo nga ang BRT project sulbad kuno sa problema sa trapiko.

Sulbad ba uroy! Ingna hinuon nga ang BRT project maoy makahatag og dakong kaguliyang sa trapiko dinhi sa Dakbayan sa Sugbo.

Mahisama kini sa BRT project didto sa ubang kanasuran nga wa gyud magmalampuson. Sa ubang mga nasud nga nagpasiugda sab og BRT, wa kini magmalampuson kay sama sa Cebu City, gagmay ang ilang mga karsada.

Kaniadto pa ko nga nagsige’g yawyaw nga kon gusto man gyud nila ni kanhi mayor Tomas Osmeña ug sa iyang mga kaalyado kaniadto nga magmugna og BRT project sa siyudad, palapdan usa unta daan ang karsada.

Unya karon nga migrabe ang problema sa trapiko tungod sa BRT project, nagsige na usab sila’g panaway. Kon ipatuman gani ang Phase 2 sa BRT project nga dili pa mahuman ang Gudalupe –UP Lahug Road project, siguradong daghang ma-high blood.

Unta, mamati ang kadagkoan sa DPWH ug ang DOTr aron tabangan nga mahuman pagdali ang giplanong bag-o nga karsada.