Maayong Balita
Sa mas suod nga paagi gidala ni Jesus ang kapid-an sa iyang mga tinun-an ngadto sa Bukid sa Tabor. Sa maong dapit nasaksihan ning maong mga tinun-an ang mahimayaong pagkausab sa panagway sa ilang magtutudlo.
Nausab ang kinatibuk-an sa maong pagkatawo. Sa maong hitabo nitungha kining mosunod:
A. Panganod nga nisimbolo sa Presensiya sa Dios.
B. Ang Tingog nga nadungog gikan sa Panganod nisimbolo sa dakong pagdason kun pag-uyon
C. Ang Presensiya nila ni Moises ug ni Elias nga nagpasabot nga ang maong mga personalidad diha sa balaang kasulatan nagmatuod nga ang maong “Mahimayaong Pagkausab sa Panagway ni Jesus” maoy katumanan sa Balaod (Moises) ug Panagna sa mga Propeta (Elias).
Kasinatian
Ang unod sa gipanagsultihan nila Moises, Elias ug Jesus mao man ang taliabot nga pagpasakit ni Jesus didto sa Krus.
Kining maong kasinatian nagpahinumdom lamang nga dili nato matagamtam ang bili sa Pagkabanhaw kondili kita moagi sa Kalbaryo.
Dugang pa ang maong hitabo nipahinumdom nato nga moabot ang panahon nga ang kahimayaan masinati usab nato sibo sa Diosnong pagbuot ug panahon.
Lihok
Karong semanaha saka sa imong kaugalingong bukid nga sa ato pa pangita og higayon sa paghilom ug pagpalamandong.
Himoa ang imbentaryo sa imong mga krus ug pagsulay ug giunsa nimo sila paggamit aron mamahimong kahimanan sa imong kahimayaan.
Pangamuyo: (Tanan) Bag-oha kami Ginoo. Amen.