Daghang salamat sa pagpakabana sa taga Boljoon sa habagatang Sugbo, nakit-an na pagbalik ang lima ka hulagway sa mga santos nga kinulit sa karaang kahoy nga nawagtang sa ilang simbahan dul-an sa upat ka dekada na ang nilabay.
Daghang salamat sa ilang kamahigugmaon sa ilang Archdiocesan Shrine of Patrocinio de Maria Santisima, nga gideklarar nga National Cultural Treasure sa nasudnong gobiyerno niadtong 1990 ug National Historical Landmark sa National Historical Commission of the Philippines niadtong 2001, mahimong mabalik na ang upat ka lima ka mga imahen sa pulpito sa simbahan.
* * *
Pero unsa may nahitabo sa mga imahen? Gikawat? Gibaligya? Makatabang pagtukas sa misteryo ang pagsubay ang pagpakita pagbalik sa mga imahen:
• Naapil ang upat ka imahen sa Edwin & Aileen Bautista Collection sa Salcedo Auctions Exhibitions sa Makati niadtong Septiyembre 2023;
• Nakit-an sa taga Boljoon ang mga imahen dihang nasibya ang kabahin sa koleksiyon sa “Executive Class” ni David Celdran sa ABS-CBN News Channel niadtong Nobiyembre 2023; ug
• Gipahibawo sa National Museum of the Philippines nga nadawat nilang mga imahen isip donasyon gikan nilang Edwin ug Aileen Bautista sayo karong buwana.
* * *
Giunsa pagkaapil sa mga imahen sa koleksiyon sa magtiayong Bautista? Kinsa may naghatag o gipalitan nila? Nahibawo ba nga gikan sa simbahan sa Boljoon? Nagsusi ba nganong napagawas ang mga imahen sa simbahan?
Gi-report ni Max Limpag sa Rappler nga napahibawo ang Cebu Archdiocesan Commission for the Cultural Heritage of the Church sa presensiya sa mga imahen pinaagi ni Orland James Romarate, taga Boljoon nga kawani sa Cebu City Cultural and Historical Affairs Office, nga maoy nakakita sa ANC. Unsay gihimo sa atsidyosesis pagbawi sa mga imahen?
* * *
Dugang pakisusi makahipos og dugang detalye sa pagkawagtang sa mga imahen. Apil na ang pag-ila sa pari nga gipasanginlan nga namaligya sa mahalon nga kabtangan sa simbahan ug pagpasabot sa artsidyosesis kon na-imbestigar ug nasilotan ba. Taga Boljoon nilista sa ilang mga pari nga posibleng makatabang sa imbestigasyon:
• Padre Demetrio Gonzales (1966-1976)
• Padre Miguel Ortega (1976-1982)
• Padre Faustino Cortes (1982-1988)
• Padre Apolonio Jumamawan (1988-1995)
• Padre Nazario Vocales (1995-2001)
• Padre Sofronio Dela Pena (2001-2008)
• Padre Milton Medida (2008-2014)
• Padre Joey Belcina (2014-2019)
• Msgr. Arthur Navales (sugod 2019)
* * *