Unsay ihatag nga regalo?

Usa ka alyansa sa mga relihiyoso ng pundok, mga kanhi opisyal sa gobiyerno ug  mga retirado ng uniformed personnel ang nanawagan kang Presidente Marcos ug kanhi Presidente Duterte nga mag-uli sa ilang kabubot-on ug mangulo sa usa ka  lukop-nasud nga panagtigum alang sa kalinaw ug kahiusa. Kon ugaling mouyon  ang duroha nga mangulo sa mang panagtigum, unsa kahay ilang ihatag nga regalo  sa usa g-usa? Motunol ba kaha si Duterte ngadto kang Marcos og listahan  sa mga drug user gikan sa PDEA diin wala ang pangalan sa naulahi? Ug  motunol ba usab kaha si Marcos ngadto kang Duterte ug pakete sa tambal  nga Fentanyl? Fezteleern!

Paresan og sud-an

Gidasig sa Department of Agriculture ang publiko nga inay rosas, maayo pa nga  bugas ang ihatag ngadto sa mga minahal sa kinabuhi sa Valentine s Day. Matud pa  ni DA USec Roger Navarro, mas maayo ang bugas kay walay tunok unya makaon pa  usab. Ang paghatag og bulak sa Valentine s Day simbolo sa pagmahal nga dili  mahimong mahulipan o mapakita pinaagi sa paghatag og bugas. Dili usab  mahimo nga bugas ra ang ihatag unya walay pares nga sud-an sama sa  sardinas o ba kaha usa ka putos nga buwad kay dili makompleto. Kon  walay pares nga sud-an, maglanlan ra sa kan-on ang gihatagan.  Madahaan!

Facebook/messenger ang hinungdan

Nabatyagan sa mga namaligya g buwak sa Carbon Public Market nga hinay ang  halin sa ilang mga tinda ng buwak bisan pa man kon menos ang presyo sa maong  paninda karon kon itandi sa miaging tuig. Kalisod sa panginabuhi o aduna nay lain  nga option pagpadayag sa ilang gibati sa Valentine s Day maoy gituohan nga  hinungdan sa kahinay sa halin sa mga buwak. Matud pa sa akong amigo,  nganong mopadala pa man og bulak nga pwede ra man mo-greet ug  Happy Valentine s Day sa Facebook o ba kaha mopadala og hulagway sa  bulak sa Messenger? Pagkatoytoy!

Motaas ang credit line

Adunay balaodnon nga gipasaka sa Kongreso nga maghatag og P50,000 nga entry-level nga sweldo sa mga magtutudlo sa publikong tulonghaan. Tumong sa maong  balaodnon nga matumbasan ang nagkataas nga cost of living. Mahinangop ang  mga magtutudlo ning maong kalambuan. Kon mosaka na unya ang ilang sweldo,  mapugngan na ang pag-abroad sa mga maestra/o. Labaw sa tanan, daghan na  ang mosalig kanila nga magpatanto og kwarta ug motaas usab ang credit  line sa Home Credit ni Maam. Muleeng!

Mobalhin ang mamalitay

Ibalhin na ang mga vendors sa Ramos Public Market ngadto sa T. Padilla Public  Market tungod kay gamiton ug himoon ang nahauna isip Cebu City College.  Padayon pa hinuon nga nakapaninda ang mga vendors sa Ramos apan  naapektohan na sila tungod kay nagsugog na man ang civil works sa maong  merkado. Bisan dili tingale uyon ang mga vendors sa Ramos nga ibalhin sila, dili  usab nila mahimong babagan ang katuyoan sa pagtukod og City College.  Pangaliya lang sa mga vendors nga maayo unta kuno kon sa pagbalhin  unya nila sa T. Padilla Public Market, monunot usab pagbalhin ang mga  mamalitay.  Syalaan!