EDITORYAL - Bomb threat dili komediya

Walay bisan kinsang tawo ang dili maalarma o mabalaka kun dunay madawat nga tawag sa telepono nga nagpahibalong dunay bomba nga gitanom sa ilang gitrabahoan. Bisan pa og kini dili tinuod, makahasol gyud.

Samot na kun ang bomb threat gipadala sa nagkalain-laing mga buhtan sa gobiyerno ug dili lang sa usa ka lugar kondili sa lain-laing lagyong dapit sud lang sa usa ka adlaw. Nahitabo kini kagahapon dinhi sa Pilipinas, Pebrero 12,2024. Ang Philippine National Police niresponde sa nagkalainlaing ahensiya sa gobiyerno  apil mga eskuylahan nga nakadawat og mga bomb threats  gikan sa nagpailang Takahiro Karasawa.

Ang maong tawo matud pa nagpaila sa kaugalingon nga usa ka abogado, bisan kinsang tawong makadawat og tawag gikan sa usa ka abogado unya pay pagka-langyaw sab ang pangalan sigurado gyung mosanong.

Apan gibutyag sa kapolisan nga kining maong tawo nihimo sab og susamang bomb threats niadtong Septiyembre ug Oktubre sa miaging tuig. Dili lang dinhi sa Pilipinas kondili apil sab sa ubang mga nasud.

Kagahapong adlawa, ang gipangtawagan nga mga ahensiya sa gobiyerno sa Zambales, sa ang DENR sa Quezon City ug Cebu City Hall of Justice.

Pulos tanan false alarm ang maong mga alarma nga gitubag sa kapolisan apan nakamugna kini og pagkadelatar sa mga transaksyon sa maong mga ahensiya sa gobiyerno.

Walay laing mahimo ang mga hingtungdan kondili ang pagkonsiderar sa tawag nga seryuso ug posibleng tinuod, nungka magmahay sa kauwahian.

Ang Pilipinas nabiktima na kaniadto og daghang mga pag-atake sa terorismo ilabi na didto sa Mindanao ug usa sa mga pamaagi sa mga terorista ang mga pagpamomba sama sa nahitabo sa Marawi City MSU bombing niadtong bulan sa Disyembre sa miaging tuig.

Kung kinsa man kining nagpadala og bomb threat, lingaw-lingaw lang tingali iyang tuyo o tinuod nga panghulga  kay nakahatag kini og kahasol sa mga tawo .

Ang Pilipinas adunay “Anti Bomb Joke Law” nga nagsilot ni bisan kinsa nga magkomedya bahin sa pagpamomba. Apan lisod pangitaon kining mga nagbuhat niini kung dili ma-trace asa gikan ug kun kinsa.