Sayop nga plataporma
Nakundisyon na gyod tingali ang ilang panghunahuna sa pagtuo sa ilang propaganda, o naanad na sa pag-insistir sa unsay gusto nilang tuohan bisan nasukwahi sa aktuwal nga mga panghitabo, o nipili lang sa padayon nga pagpaka aron ingnon sa sitwasyon nga sila ang labing nahibawo nga di na mao.
Ang nalista sa ibabaw mao ray akong mahagdaw nga posibleng katin-awan sa pasalig sa duha ka kinatas-ang opisyal sa nasud–silang Presidente Ferdinand Marcos Jr. ug Bise Presidente Sara Duterte Carpio–nga bisan sa karambola sa ilang mga dumadapig nagpabilin pa ang UniTeam.
* * *
Palihug subaya unsa kalisod ang pagkumbinser ni Carpio sa iyang kaugalingon nga alyado pa siya sa administrasyon: Gipapas sa Kongreso ug Malakanyang ang iyang P650 milyones nga confidential funds bisan sa iyang pasidaan batok sa mga kontra sa kalinaw ug sa nasud.
Ug iyang kampo nikondenar na sa administrasyon: Iyang amahan nitawag sa presidente nga bangag ug adik; iyang manghod niawhag sa presidente pag-resign; iyang gibalikas si House Speaker Martin Romualdez nga tambaloslos; iyang maguwang nitawag ni Romualdez nga tambok-loslos; ug ilang binayrang trolls nibugal-bugal sa administrasyon nga pulburon.
* * *
Palihug susiha sab unsa kalisod para sa presidente ang pag-ulug-ulog ni Carpio nga iyang BFF: Iyang asawa bantang niisnab ni Carpio atubangan sa gabinete ug publiko ug niawhag niya pagtaktak sa nahibilin nga mga alyado sa mga Duterte sa Malakanyang ug ubang ahensiya.
Iyang administrasyon wa na managana pag-apiki sa mga Duterte: Gigamit ang ICC isip panghudlat; gipamugos ang cha-cha; nisamot pagsikit sa US batok China; ug gipawong nang ilang turutot, ang SMNI ni Apollo Quiboloy.
* * *
Ambot nagtuo ba kaha ang presidente ug bise presidente nga magpabilin ang UniTeam tungod lang sa ilang sulti. Ug ambot unsa pay gipaabot nga benepisyo sa pagwara-wara sa UniTeam samtang nagtampokay sa ilang masig ka bukubuko.
O tingali naglisod lang silang Marcos ug Carpio sa pagpasabot sa mga botante nga ilang nakumbinser sa pagpili nila batok sa mas ligdong ug mas takos nilang mga kaatbang sa niaging kampanya nga sayop diay ang ilang pasalig nga ang UniTeam makasulbad sa kakabos, kataas sa presyo sa bugas ug ubang mga palaliton, pangurakot, kriminalidad, ug sa bisan unsang problema nga ilang nahunahunaan.
* * *
- Latest
