Nagkagamay nalang ang nahibiling mga lehitimo ug independenteng media outfit dinhi sa Pilipinas tungod sa pagkubos sa kita ug dili na halos makapasweldo sa mga empleyado ug sa operasyon niini.
Ang CNN Philippines dugay na nga media outfit dinhi sa Pilipinas sud sa siyam ka tuig naghatud og mga tinud-anay nga mga impormasyon ug balita bahin sa mga nanghitabo dili lang dinhi sa Pilipinas kondili apil sab sa tibuok kalibotan.
Tungod sab niini, subo kaayo palandungon nga gibanabanang 300 ka mga empleyado niini ang nawagtangan sab og trabaho sugod niadtong Pebrero 1, 2024.
Gi-operate kini sa Nine Media Corporation ug Radio Philippines Network (RPN) ubos sa Warner Bros. Discovery Asia Pacific.
Libre lang unta ang pagtan-aw sa CNN kay kini usa man ka free-channel, apan matud pa sa tanang katuigan sa pag-operate niini, moabot sa P5 bilyones ang naalkanse sa kompanya tungod kay menus ang nagpa advertise.
Ang media outlets dili mabuhi kun walay mopa- advertise niini. Diha gikan ang kwartang pangsweldo sa mga reporters, editors, cameramen, researchers, managers ug tanang staff. Apil sab ang gastos sa operasyon ug uban pang balayrunon.
Kun walay advertisement nga mosulod, maalkanse gyud ang kompanya ug dili na maka-operate. Gawas pa niana, nasuta sab nga bisan ang pangbayad sa gibanabanang kapin P50 milyones nga renewal sa prangkisa niini dili na mahatag sa maong kompanya mao nga nakadesider sila nga tak-opan na kini sa hingpit.
Bisan unsa pa ka kasikat ang mga news anchors, reporters, cameramen, researchers ug credible, patas sa pagbalita, makalingaw ang mga programa, o basahon sa showbiz ug sports, ug sa kadako sa impluwensiya sa usa ka media outfit kun wala nay magpa-advertise kanila mapugos gyud kini og panirado.
Subo man hunahunaon, ang independenteng media outfit sama sa CNN Philippines, negosyo gihapon kini ug nagkinahanglan og kwarta aron makapadayon sa ilang halangdon nga trabaho ug ang gisaligan niini ang kita gikan sa advertisements.
Apan nabantayan karon nga sagad sa mga advertisement naa na karon sa social media platform. Gani bisan ang mga media companies aduna nay kaugalingong online editions aron dili sab mabiyaan sa panahon.