Gipasabot sa environmental expert nga si Carlo Babiera nga dili kinaiya sa bitin nga modayon og pamaak gawas kon kini maapikihan o hagiton gyud. Kinaiya sa bitin nga molikay gayud sa tawo. Apan adunay laing matang sa bitin nga angay gayod likayan. Sila kadto’ng mga traydor nga kauban sa trabaho o ba kaha mga “higala” nga maayo kaayo sa atubangan apan inig talikod nimo, “paakon” ka sa ilang malala nga mga libak ug pagpangdaut. Sayon ra ilhon kining maong matang sa bitin kay dili man sila manitsit (hiss) kon dili motawag kanimo nga BFF, babe, love, bro, ug uban pa’ng susama’ng pulong. Fishkots!
Usher sa swertres
Naglaraw ang Department of Social Welfare and Development (DSWD) nga isalindot na sa hingpit ang mga purchase booklets ug nga pulihan na kini sa online records. Ang purchase booklet kinahanglanon kon buot ang senior citizen mo-avail sa discount matag palit og tambal ug uban’g panginahanglan. Kon mahinayon, usa kini ka “sensible” nga lakang sa kagamhanan ug ikalipay gyud sa tanan’g mga senior citizen. Matud pa bitaw sa among sillingan nga senior citizen, “Mas maayo wagtangon ang purchase booklet, kay gawas nga kanunay nako makalimtan, maala-an pud ta usahay nga ‘usher’ sa Swertres kon ato kini’ng gibitbit.” Madahaan!
Ongoing lang gihapon
Ang kalangan sa pagtrabaho sa Cebu Bus Rapid Transit (CBRT) nga nahimong hinungdan sa kagubot ug kahuot sa trapiko nakapaaghat sa konseho sa dakbayan sa Sugbo pagpalabang og resolusyon nga nag-awhag sa DOTr sa daling paghuman sa maong proyekto. Dalaygon ang pagpakabana sa konseho, apan adunay panultihon nga “sa dili pa nimo buyagon ang mota sa uban, kuhaa una ang mota sa imong mga mata”. Mora’g haum man kini’ng panultihon sa konseho kon atong ipunting ang atong panan-aw sa CCMC project diin, human sa bilyones nga gasto ug sa kadaghan sa kontraktor nga mitrabaho, nagpabilin gihapon nga “on-going” ang status. Manilhig una kita sa atong tugkaran mga ‘Honorable.’ Fezteleern!
Gugma’ng giatay
Ni’ng pagsugod na sa buwan sa Pebrero, nga gitawag usab og “Love Month,” mipasidaan ang Cebu City Police Office (CCPO) sa publiko nga magmabinantayon sa mga love scams labi na diha sa mga online media platforms. Nagkadaiya ang matang sa mga love scammers. Adunay magpalooy-looy, adunay magpa-pulis-pulis o sundalo, adunay mga ‘sungkaban’ nga mangbiktima og mga biyuda/biyudo, o linghod ang panghunahuna. Apan taliwala sa mga pahimangno, daghan pa gihapon ang mailad ug mabikitma. Niini, yano’ng mipasabot ang akong apohan nga, “Tungod kana kay mas sakit ang bati-on nga mag-inusara sa Valentine’s Day, kay sa mailad sa “gugma’ng giatay.” Pagkatoytoy!
Buot paakon ang ikog
Nanawagan ang kagamhanan pinaagi kang Presidential Peace Adviser Carlito Galvez Jr., sa katawhang Pilipino nga magpabiling nagkahiusa ug nga isalikway ang panawagan nga gitumong sa pag-destabilize sa nasud labi na gayod ang awhag nga ihimulag na ang Mindanao. Wala may bikil sa panawagan ni Galvez apan kon atong basehan ang imbestigasyon sa senado, wala magagikan sa katawhan ang giingon’g kagubot ug destabilisasyon kon dili gikan mismo sa mga namunoan. Nahisama na hinoon si Galvez sa iro nga nagtuyok-tuyok kay buot niya paakon ang iyang ikog. Saoonz!