Imong balay
Duna kay 37 anyos na nga balay. Giingnan ka sa makadaghan nga higayon nga panahon na nga bag-uhon. Kay ang porma wa na ma-uso sa bag-ong panahon. Gipasidan-an nga kon di nimo usbon samot ka nga mabiyaan sa mas dato nimo nga mga silingan.
Dunay nanaway sa imong atop. Dunay nikulismaot sa imong mga pultahan. Dunay nitulisok sa imong mga bintana. Dunay nagbugal-bugal sa imong sandayong. Dunay nipadayag og kaalarma sa imong bungbong. Dunay nipasidaan sa kahuyang sa imong mga haligi. Gipadako gyod pag-ayo ang krimen sa imong pinuy-anan.
* * *
Daghan nang politiko ang nisuway sa pag-usab sa imong balay sa nangaging katuigan. Pero pulos nimo sila gibalibaran. May mga presidente, mga kongresista ug mga mayor nga nisuway pagkumbinser nimo sa pagsugot sa kausaban. Pero nagduda ka sa ilang katuyoan.
Mao nga napakyas ang daghan na uyamot nila nga mga pagsuway sa pagpapirma sa mga sakop sa imong pamilya aron usbon ang imong balay. Tungod sa imong pagpaminaw sa ligdong nga mga tingog ug kamakiangayon sa korte, nabawo ang tanan nga mga panghaylo, panghudlat ug panlingla nga ilang gipasiugdahan.
* * *
Karon gibulatikan ka og bag-ong grupo nga nipasalig nga ang ilang usbon mao ra ang kayda sa imong balay. Nisaad nga di nila hilabtan ang ubang bahin. Ang kayda ra gyod ang ilang paninduton. Aron mahimong mas madanihon sa mga bisita.
Ug kay nagduda man gihapon nga di kayda ray hilabtan, kay kon makasugod na kinsa pa man tuod ang makapugong nila unsay usbon sa balay, niluwat sila og mas yano nga tanyag. Wa na sila maghisgot og bisan unsang bahin sa balay nga usbon.
* * *
Ilang gitun-an ang mga sayop sa nangaging mga pagsuway nga imong gisalikway. Ug maoy gilikayan sa kinabag-ohan nga maniobra:
· Nipabaha sila og kuwarta aron mas paspas nga makolekta ang igo nga gidaghanon sa mga pirma sa mga sakop sa imong pamilya; ug
· Nangayo lang sila og kopya sa yawe sa kandado sa imong balay (nga kon mahatag kay magpalipat ka, matinuod ang imong kahadlok: Sila nay magbuot unsaon pagbuslot ang imong atop, bungbong ug sandayong, paglungkab sa imong mga bintana ug pultahan ug pagpayaka sa imong mga haligi).
* * *
- Latest
