Wala magkulang sa mga pahimangno ang atong mga otoridad ngadto sa mga kapitan o timonil nga kinahanglang obserbaran kanunay ang pagmintinar og luwas nga distansiya sa masig ka mikuyog-apil nga mga pump boats ug motor-bancas sa 2024 Santo Niño Fluvial Procession sa miaging Sabado, Enero 20, 2024.
Apan anugon lang ang mga warning ug guidelines nga gustong ipasunod sa coast guards, kinsa mibubo mismo sa ilang serbisyo, naningkamot nga mamintinar ang gilay-on sa mga nagkalainlaing sakyanan sa dagat nga misalmot aron makontrolar ang pagdul-it niini ngadto sa galleon (barko nga gipanag-iya sa pamilyang Matiao sa Dumaguete City), diin didto lulan ang imahe sa atong Balaang Patron, Señor Santo Niño.
Kay bisan pa sa mao nilang pagpaningkamot, aduna gihapoy aksidenteng nakalusot. Taliwala sa kamahigalaon sa dagat ug panahon, usa ka motorized banca nabuslot ang pangulahiang kilid ug hinayhinay'ng nagakaunlod, nga nakapahadlok sa mga pasahero, ilabi na sa mga senior citizens nga medyo hinay na.
Hinuon, bisag ulahi nang nahiabot ang coast guard, naluwas ra gihapon tanang sakay pinaagi sa tabang sa mas dakong motorized banca nga maoy nakasungag-buslot sa gamay. Bisan og mas nauna pa ang pagkuhag video kay sa otomatik-dinaliang pagsalbar.
Unsa bang hitaboa nga mibutho man lag kalit ang maong insidente? Base sa video nga gi-post sa Facebook, usa sa mga pasahero (babaye) sa nalunod nga banca misaysay, nga bisan straight ang dagan sa dakong motorized banca paingon sa gipuntariyahan niining direksiyon, ilang namatikdan nga ang gisakyan nilang gamayng motorized banca mi-cross kuno sa agianan ug may nakatuaw nga ‘hala, mabangga ta!’ Ug unya, naabtan gyod sila.
In fairness, sa pagsulat niini, wala pa mahibaloi ang kinatibuk-ang detalye. Pagaimbestigahan pa kini sa mga hingtungdang otoridad aron masubay ug masayran kinsay sad-an? Usa ra gayod ka butang nga nakaseguro ko. Sa mga nanagdala sa timon sa nahisgotang mga banca, kinsa kinabuhi sa mga tawo ang nakasalalay sa ilang mga kamot, usa kanila ang nagmadanghag.
Maayo na lang, nga daghan ang makanunayong misalig-ampo sa atong Milagrosong Patron. Ug Iyang gihaw-as ang tanang sakay sa nahisgotang banca aron maluwas. Aron dungan sa bibong dinahunog sa nag-Sinulog 2024, makapasalamat-siyagit og kusog: “Viva, Pit Senyor!”