Miduyog ang panahon kagahapon para sa Pista Senyor ug sa Sinulog Festival, way uwan apan pwerte sab inita kaayo sa panahon.
Apan bisan pa niini, ang kapolisan mibana-bana nga moabot og kapin 3 milyones ang nitan-aw sa mga kalihokan.
Hapit tibuok populasyon sa siyudad ang nanan-aw sa maong selebrasyon, apan kadtong mga nanggawas ug nanan-aw dili tanan taga Cebu City.
Gikan sa downtown area hangtud ngadto sa South Road Properties nagpunsisok ang mga tawo. Sa downtown Cebu City nagdasok ang mga tawo ilabi na sa Basilica Minore de Sto. Niño ug sa mga kadalanan padung sa maong simbahan.
Sa SRP, napuno gyud ang kadalanan ilabi na duol sa venue sa Grand Parade ug sa Showdown pagkahapon hangtud gabii kay daghan ang nagpaabot sa fireworks display, bisan ang usa ka dakong mall sa maong lugar napuno gyud sa tawo.
Ang Sinulog nga usa ka kulturahanong kalihokan may labot sa Pista Senyor nakapadani og daghang mga dumuduong, lokal man o langyaw tungod sa kasadya niini, bahala pa og unsa ang lakaw sa panahon.
Gawas nalang sa mga ginagmay nga mga insidente sama sa mga batang nasaag, dunay pipila ka mga tawong nangreklamo sa kainit sa panahon ug kalayo sa ilang gilaktan.
Mga bagulbol sa pipila nga wala sab makaapektar sa kinatibuk-ang kalihokan ug uban pa.
Maisip gihapon nga kalamposan ang nakab-ot sa pagpahigayon sa Sinulog ug sa Pista Senyor karong tuiga. Ug kini magbilin og maanindot nga kasinatian sa mga tawo ilabi na sa mga unang higayon pang nakasaksi niini.
Angay pasalamatan ug pakpakan ang tanan , ilabi na ang Simbahan, ang lokal nga kagamhanan sa siyudad pinangulohan ni Cebu City Mayor Michael Rama, ang kapolisan, ang kasundalohan, kabomberohan, coastguardsmen, mga emergency personnel, volunteers ug ang katawhan.