Ngari kamo ug tan-awa

Enero 14, 2024: Ikaduhang Domingo sulod tuig

Mga Pagbasa: 1 Sam. 3;3-10/Sal. 40/1 Cor. 6;13-15,17-20/Jn. 1;35-42

Maayong Balita

Usa kini sa mga teksto nga gigamit sa pagsaysay sa sugilanon sa bokasyon sa  mga unang tinun-an ni Jesus. Siyempre nahimong plantada ang personahe ni Pedro ingon man ni Andres.

Kining maong sugilanon nagpakita sa transisyon nga nahitabo sa ilang kinabuhi. Sugilanon kini sa mga mananagat nga nirisgo sa ilang ekonomikanhong kaugmaon pinaagi sa pagsunod kang Jesus nga taga Nazaret ug ang pagbiya sa ilang naandang kinabuhi ug panginabuhi nga mao ang pagpanagat. Sa laing mga teksto sa ebanghelyo si Jesus niingon man kang Pedro sukad karon managat ka na og mga tawo.

Kasinatian

Nahimong hilisgotan karon sa mga nagkadaiyang houses of formation ang pagkunhod sa mga bokasyon sa pagkapari ug pagka relihiyoso.

 Daghan ang nanggawas ug diyotay na lamang ang nisulod. Nga sa ato pa, moabot ang panahon nga dili na gyud paigo ang gidaghanon sa mga kaparian batok sa gidaghanon sa mga tawo ug mga parokyano.

Dugang pa atong nakita usab nga ang simbahan karong mga panahona ang Simbahan ingon man ang iyang mga sakop ang nahimutang man sa kontrebersiya ug mga isyu. Hangtud asa kutob kaha ang atong paglahutay ug unsa kaha ang mahimong kaugmaon sa simbahan?

Lihok

Karong mga panahona angayan kitang mag-ampo alang sa bokasyon nga unta mas daghan pang mga mamumuo sumala sa kasingkasing ni Jesus. Dugang pa, suporta sa seminaryo pinaagi sa pagpaambit sa imong mga panalangin bahala na og ginagmay basta kanunay.

Pangamuyo

Tanan: Ginoo Magpadala ka unta og mga Balaang Apostoles sa imong simbahan!