Ang Legaspi Extension wa maapil sa lista sa Tokagawa nga mangolekta sila og parking fees, unya gibabag pa gyud nila ang pagpa-park sa mga sakyanan nga kalapasan sa Zoning Ordinance.
Ang Commission on Audit nagtoo nga nabentahaan ang Cebu City government niining kontrata sa siyudad ug sa Tokagawa, usa ka pribadong kompaniya.
Matud sa COA nga wa usab himoa sa kadagkoan sa Dakbayan sa Sugbo ang iyang katungdanan nga sutaon kanunay ang mga rekords sa Tokagawa, ilabi na ang mga POS gadget nga gigamit nila pag-isyu og resibo sa mga mibayad sa parking fees.
Ang ordinansa sa dakbayan sa Sugbo nga nagtugot sa pagbutang og designated pay-parking areas sa siyudad, nagtugot lang sa pagpangolekta og parking fees sa adlaw’ng Lunes ngadto sa Sabado, gikan sa alas siyete sa buntag hangtud sa alas siyete sa gabii.
Apan nasuta sa Traffic Board nga bisan sa adlaw’ng Sabado ug Domingo nga wa na itugot sa ordinansa ang pagpangolekta og parking fees, ang Tokagawa collectors padayong nangolekta.
Unya, bisan alas siete ra sa gabii kutob ang gitugot nga mangolekta og parking fees, may mga dapit nga nangolekta gihapon ang Tokagawa hangtud sa alas nuybe sa gabii.
Ang COA sa Annual Audit Report (AAR) mikutlo sa balaod nga gilatid sa Section 130 sa Local Government Code nga ang pagpangolekta sa mga local taxes, fees, charges, ug uban pa, dili gyud itugyan sa mga private persons.
Matud sa COA nga ang parking fees sa mga sakyanan nga mo-park daplin sa karsada maisip nga “charges” ug dili gyud ikatugyan sa mga private persons. Natan-aw sab sa COA nga alkanse ang siyudad sa Sugbo nga modawat lang og P8.7 million nga bahin sa kita sa parking fee collections kay dihang ang CITOM pa maoy nagdumala sa parking slots sa siyudad, dagko man kini og makolekta.
Ang Tokagawa misumiter og dukomento nga nagpakita nga dihang ang CITOM pa kuno ang nagdumala sa pagpangolekta sa parking fees, gamay ra ang koleksiyon.
Apan kahibudngan kay ang ilang gipakita nga basehanan mao ang mga buwan, gikan sa Agosto 2016 ngadto sa Hulyo 2017. Pangutana, nganong dili man sa tibuok tuig 2016, o kaha 2017?
Gikan kuno sa Agosto 2016 hangtud sa Hulyo 2017, ang Cebu City government mikolekta lang og P25.8 milyones, ug dihang gimenosan sa mga gasto, milimpyo na lang kuno ang siyudad og P7.7 million.
Mora’g gipili nila ang termino nga gikan sa Agosto 2016, ngadto sa Hulyo 2017 nga ang koleksyon sa mga buwan miabot lang og P25 milyones, pero kon tan-awon nimo ang kinatibuk-ang koleksyon sa tuig, dako diay.
Kini maoy ipadayon nato paghisgot karong Martes.