EDITORYAL - Trahedya sa Opon

Makasubo kining duha ka mga nahitabong trahedya sa Dakbayan sa Lapu-Lapu ning semanaha. Ang pag-ulbo sa pabrika sa pabuto sa Barangay Babag  sa nakalabay nga adlaw nga dunay nakalas ug ang sunog sa Barangay Pusok kagahapon.

Ang pag-ulbo sa pabrika sa pabuto way laing mabasol bisan unsa pay rason kondili ang pagpabaya gyud sa safety sa trabahoan. Samot na nga kining klase sa ilang gihimo peligroso kaayo.

Kun giseryuso lang ang safety sa kada usa sa mga nagtrabaho, dili mahitabo ang maong aksidente.

Duna say pagkulang ang mga naa sa katungdanan tungod kuwang sila sa pagsige og maymay kada adlaw tungod sa klase aning ilang panginabuhian.

Sa nahitabong sunog kagahapon, adlaw nga Martes sa Barangay Pusok daghang mga Oponganon ang maminghoy karong kapaskohan tungod sa hitabo.

Walay gusto aning tanan nga mga trahedya, apan naa tanan sa tawo ang sagad hinungdan nganong dunay mga sama niini nga mga hitabo, tinuyoan man o dili, ang tawo gihapoy mabasol.

Karong bag-o, gipahibalo sa mga eksperto sa lakaw sa panahon nga masinati ang pagsaka sa temperature tungod sa epekto sa El Nino nga molanat pa hangtud sa bulan sa Mayo sa sunod tuig.

Basta gani taas ang temperatura, naa gyud kanunay ang peligro sa sunog tungod kay ang halos tanang butang uga kaayo ug daling mosiga sa kalayo nga maoy mamahimong sinugdanan sa sunog.

Ang sunog mahimong malikayan kay kasagaran niini tawo ang hinungdan, dili sama sa baha, bagyo, ug linog nga iya sa kinaiyahan ug walay makatagna unsa kagabangis ang epekto.

Maayo tingaling dili mohunong ang mga hingtungdang mga ahensiya sa pagpasidaan, kampanya ug fire prevention ug fire fighting trainings sa mga komunidad aron dili moabot sa puntong modako ang sunog.