Way nakahunahuna sa gobiyerno pag-imbitar sa mga lokal nga manghimoay og mga sakyanan, partikular na kining mga pasaheroan aron makaapil aning modernisasyon sa transport sector sa nasud.
Daghan man untang lokal nga pabrika aning mga pasaheroan kaniadto sama sa Lawin, Sarao, Pasahero, Chariot, Francisco Motors, Harabas, ug daghan pang uban nga pwede untang maoy gipahimo anang mga modernized jeepneys.
Pwede gyud unta gihimong polisiya sa gobiyerno diha sa Public Transportation Modernization nga kinahanglang “Philippine Made” ang mga ipuli sa mga kagang-kagang nga traditional jeepneys.
Kung papormahay lang, maayong manghimo ang mga Pinoy, samot na kun dunay desinyong ipasunod para parehas ang tanan. Tinuod wala silay kapabilidad sa paghimo og kaugalingong makina, apan mahimo man kining paliton gikan sa gawas. Ang electric motors mahimo anhi ra sab himoon sa Pilipinas.
Kinahanglan lang gyud og gamay nga tabang gikan sa gobiyerno aron kining local manufacturers makahimo og “Philippine-made” modernized jeepneys nga nigamit og imported nga mga makina nga nituman sa European 4 Engines o environmentally friendly nga electric motors.
Kinsa mang pabrikaha sa makina ang mobalibad kun ang ilang suplayan ang tibuok programang modernisasyon sa transport sector sa Pilipinas?
Kaliboan ka makina o motor ang gikinahanglan aron padaganon ang Philippine Made nga modernong pasaheroan.
Kun nahitabo nga dunay assembly niini dinhi, daghang Pilipino unta ang nakatrabaho ug makatabang sa ekonomiya, bentaha sab kini kay mas menus ang presyo kun itandi anang tag P3milyones ngadto P4 milyones ka pesos matag unit gikan sa gawas.
Sa modernisasyon sa public transport karon, ang China nga maoy pinakadaghan og gi-export dinhi nga modernized jeepneys mao ray nabulahan.