Gipamatud-an sa pangulo sa kapolisan sa dakbayan sa Sugbo nga dili lang kutob sa apilyedo kon dili gipakita niya sa abilidad ang iyang pagka "THUNDER" Police Col. Ireneo Dalogdog kong ininglison pa “thunder.” Bisan pa man sunodsunod nga major incidents sa pagpanulis sa dakbayan sa Sugbo wala kini makatarog sa liderato sa kapolisan sa syuydad, hinoon dinhi nakita ang katakos nila kon unsa ka paspas ang ilang lihok aron masolbad dayon ang krimen.
Unang kulata nga nadawat sa CCPO ang nahitabong pagpanulis sa Oro Sugbu Pawnshop & Jewelry Store sa dakbayan sa Sugbo diin gihurot gyud sa mga tulisan sa pagdala ang tanang alahas. Nahitabo kini alas otso sa buntag nga aduna nay daghang tawo ug nilampos ang mga tulisan sulod lang sa pipila ka minutos nakasibat dayon nga murag kilat.
Apan wala kini mosaler sa Dalogdog sa kapolisan sa dakbayan diin dali ra silang napawong ug nadakpan sulod lang sa hamubo nga panahon, apil pa ang gitumbok nga mastermind sa pagpanulis ug silang tanan napasakaan na og kaso sa piskalya.
Ikaduhang kulata ang nahitabong pagpanulis sa bukirang Barangay Binaliw diin ang mga biktima ang duha ka negosyante gikan sa General Santos City kinsa giunay sa pagtulis sa kaila niini kauban ang duha ka kakunsabo nga silingan diin nakuha ang mokapin sa P700,000.
Wala gihapon palupig ang mga pulis diin nadakpan ang mga suspek wala ray 24 oras, another “Tatak Thunder” na usab ang gipakita sa mga otoridad sa Cebu City. Kining robbery incident ra ba dili unta diay ni sa Cebu City himoon apan nataymingan lang gyud kuno. Aw perting dimalasa ang mga tulisan kay nakatayming pud sila nga ang mga otoridad nigamit sa ilang thunder skill nga nisangpot sa ilang pagkasikop.
Sa gipakita nga abilidad sa mga pulis ubos sa liderato ni Col. Dalogdog o thunder sa ininglis pa angayan lang sila nga daygon ug pasidunggan kay dili baya basta bata ang pagsolbad sa usa ka krimen ilabi na kong ang mga nalambigit mga banggiitang kriminal sama sa mga niransak sa alahasan.
Kong nahitabo pa nga wala masulbad ang duha ka mga robbery incident, seguro mabulit gyud sa pagsaway ang kapolisan ug ang ilang hepe kay lagi nganong nalutsan man sa mga kriminal. Sa kagamay sa mga personnel sa CCPO itandi sa kadaghan sa mga tawo sa syudad dili gyud nila mabantayan ang tanan.
Sige lang ug nalutsan sa mga tulisan, ang importante nga nadakpan usab sila dayon ug napasakaan a og kaso busa usbon nako ang pagpadangat sa pagdayeg sa katakos nga gipakita nila. Labaw sa tanan ang katawhan nga katambayayong usab sa ilang kalamposan.
Dili lang nato tan-awon ang negatibong aspeto. Inay ato pud ilhon ang kaayohan nga ilang nahimo, dili lang kita manaway kon dili modayeg usab sa mga binuhatan nga angayang daygon. Dili man perpekto sila apan gipakita sa mga pulis ang paningkamot nga maresolbar ang nahitabong krimen aron mamintinar ang kahapsay ug kalinaw sa katawhan.