Sumbalik sa pataka
Hangad sa bungbong, mao nay pasiaw nga tambag sa karaang mga peryodista ngadto sa mas batan-on nilang kaubanan kon hapit na ang deadline ug wa pay balita. Kasagaran sa mga balita nga matagak gikan sa bungbong maglakip sa mosunod nga mga pung:
Kasaligang tinubdan;
Tinubdan nga di magpaila;
Tinubdan nga nihangyo nga di magpaila;
Tinubdan nga nihangyo nga di magpaila tungod sa kahadlok sa iyang seguridad; ug
Tinubdan nga di nihangyo nga di magpaila kay wa siyay pagtugot, o di pa tukma ang panahon, sa paghatag sa sensitibo nga kasayuran.
* * *
Tungod sa ilang track record sa pagpataka, gidudahan nga naghangad-hangad ra sa bungbong si SMNI host Jeffrey Celiz. Maong may sukaranan ang mga kongresista sa pagkuwestiyon sa iyang pangangkon nga taga Senado ang tinubdan sa kasayuran nga P1.8 bilyones ang gasto sa mga biyahe ni House Speaker Martin Romualdez. Kay nikumpisal si Celiz nga:
Sayop diay ang kasayuran;
Wa niya susiha ang nadawat nga kasayuran sa wa pa isibya; ug
Wa siya mopasangil og kahiwian kon dili igo lang nangutana ni Romualdez unsa katinuod ang nadawat niyang kasayuran.
* * *
Lehitimong news organizations dunay mga lagda pagsegurong ang kasaligang tinubdan di magamit sa tapolan nilang mga sakop:
Di kasaligan ang tinubdan nga bisan sa reporter di magpaila ug kon nagpaila man way nahibawo ug way paagi sa pagsusi unsa kakasaligan;
Subayon ang katinuod sa kasayuran sa laing mga paagi kon madasonan ba sa mga dokumento o laing mga tinubdan nga magpaila; ug
Mapuslanon ba ang kasayuran nga mahimong magpapriso ang reporter aron pagtuman sa saad pagtago sa tinubdan.
* * *
Pero nahibawo tang tanan nga di lehitimo nga news organization ang SMNI. Paspas silang nilayas sa Kapisanan ng mga Brodkaster ng Pilipinas (KBP) human nabisto nga way accreditation si Celiz. Gisupak sab ang ilang saad ngadto sa Movie and Television Review and Classification Board (MTRCB) nga di na isibya ang dugang panghulga ni kanhi Presidente Rodrigo Duterte pagpatay ni Kongresista France Castro.
Mahimong maglumba og pahumot sa Kongreso ang National Telecommunications Commission (NTC) ug MTRCB pagsuspenso sa mga sibya sa SMNI. Sa di pa ipahamtang ang gihanigan nang desisyon sa mga kongresista pagbasura sa ilang prangkisa.
- Latest
