Hain ang mga alahas?

Unom na ka mga tawo nga gidudahang nalambigit pagtulis sa Oro Sugbu Pawnshop

and Jewelry Store sa down town area sa dakbayan sa Sugbo ang nadakpan sa

kapolisan hangtod niadtong Martes sa gabii.

Katapusang gidakop sa kapolisan mao ang ilang gitumbok nga mastermind sa

tulis---ang kanhi gipasanginlang  lider sa mga rebelde nga si Jigger Geverola. Si

Geverola kasamtangan nga nag-alad sa Kapitolyo sa Sugbo isip usa sa mga kawani

sa usa ka membro sa Hunta Probinsiyal.

Gawas ni Geverola anaa na sab sa kustodiya sa kapolisan ang giingong iyang mga

kauban nga sila si Jerum Davin, 37; Dann Carlos Geverola Flores, 23; Jordan

Ramos Baquiano, 29; ug laing duha pa nga magtiayon nga taga Mandaue.

Gawas nilang Flores ug Baquiano nga maoy nabawian sa kapolisan sa awto nga

giingong maoy getaway vehicle sa mga tulisan wa pay gitug-an ang mga polis ug

unsay ebidensiyang ilang gihuptan nga maglambigit sa ubang mga dinakpan sa

nahitabong pagpanulis.

Apan ang akong tinubdan mitug-an nga si Flores, kinsa pag-umangkon ni Geverola,

maoy mikanta sa ilang kalambigitan sa krimin ug giingong mitudlo sa iyang uyoan nga

maoy nagplano ug nagsugo nila.

Apan daghan pa ang mga pangutana nga angayang matubag aron masiguro nga ang

mga dinakpan mao gyuy responsabli sa krimin.  Dako hinuon ko og pagsalig sa

katakos sa atong kapolisan ug ako naglaum nga abunda ang ilang mga ebidensiya

batok sa mga dinakpan.

Usa ray akong panghinaut nga way “fall guy” sa mga dinakpan aron lang

makalingkawas ang kapolisan gikan sa pressure sa publiko ug sa mga opisyal sa

dakbayan nga sulbaron sa labing dali nga panahon ang pagpanulis.

Ug usa ka butang ang gikinahanglan aron mabug-os ang pagtuo sa publiko nga wala

masayop ang mga awtoridad—kini kun makuha sa kapolisan ang mga kinawat nga

alahas.

Kun ang mga dinakpan mao gyud ang responsable, tingali wala pa nila mahurot og

baligya ang mga alahas.  Duna pa gyud tingali nahabilin nga mahimong magamit isip

ebidensiya.

Importante nga marecover sa kapolisan bisan kabahin lang sa mga kinawat nga

alahas sanglit mao ni momatuod nga duna gyuy tulis nga nahitabo ug nga ang mga

dinakpan maoy naghimo---gitawag ni sa mga abogado sa pinulongan nga latin nga

Corpus Delicti!