EDITORYAL - Transport strikes

Nilusad og transport strike ang mga transport groups nga supak sa matud pa phase out sa mga traditional jeepneys karong Disyembre 31 ning tuiga. Ang ilang reklamo, dili kaya sa bulsa ang pagpalit og bag-ong units para makapadayon sila sa ilang panginabuhi.

Ang Land Transportation Franchising and Regulatory Board miingon nga dili phase out sa TPUJs ang mahitabo sa Disyembre 31, kondili deadline lang kini para sa tanang mga drayber ug operators nga mag consolidate o magpundok aron moporma og kooperatiba o asosasyon.

Giklaro sa maong buhatan nga bisan wala pay ikapalit og bag-ong unit sama anang mga modernized PUJs nga nagdagan na karon dinhi sa kadalanan sa Sugbu, makapadayon gihapon sila og pamasahero.

Nagpasabot kini nga dili deadline sa tanang TPUJs ang maong petsa kondili ang pagpundok o pagporma ra og kooperatiba. Kay sa kaniadto, watak-watak ug iyahay ra og diskarte ang mga drayber ug operators.

Kadtong tubig-tubigan nanag-iya og mga units nga paabangan nila sa mga drayber bugti sa “boundary”, gitawag sila nga mga operators.

Ang drayber, nag-abang ra gyud ug kun pilay masobra sa gibayad nilang boundary ug tubil sa petrolyo, mao ray ilang madala sa pamilya.

Maayo man gihapon kini ang sistema, apan ang nakaparat, bisan kadtong mga kagang-kagang na ug dili na roadworthy nga mga PUJs, daghan na og deperensiya, itom na kaayo og aso, pirmeng maaberya tungod sa kakaraan, padayon pa gihapong gipaabangan sa mga operators nga nag-apas lang sa abang sa drayber.

Ang resulta, usahay wala nay mahibilin sa drayber kay sige kaguba samtang sila namasada, nakapuno sab kini sa polusyon ug nabutang pirme sa peligro ang mga pasahero. Kaning modernisasyon sa public transport system gisugdan kini sa panahon pa sa administrasyong Duterte, apan dugay na kining giplano sa nanglabay pang mga presidente, apan nganong hangtud karon wala man gihapon maninguha ang mga operators ug mga drayber makabaton og bag-ong unit?

Kinahanglan tingali sa gobiyerno nga gawas aning modernisasyon sa mga pasaheroan, mogahin sila og pundo para sa laing alternatibong transport system nga i-operate sa gobiyerno o ba kaha sa pribadong kompanya aron di ma-hostage aning mga transports groups ang mga pasahero matag dunay mga polisiya silang dili gustong buhaton.