Nakuha ni kanhi Senador Leila de Lima ang temporaryo niyang kagawasan sa nahabilin niyang kaso nga may kalambigitan sa gidili nga drugas human giuyonan sa hukmanan ang giduso sa iyang mga abogado nga motion for reconsideration sa pagbasura sa una niyang gipangayo nga temporaryong kagawasan.
Niadtong Lunes, Nobyembre 13, 2023 human sa unom ka tuig, walo ka buwan ug 24 ka adlaw, temporaryong nakagawas na sa kustodyal nga pasilidad sa nasudnong polisya sa kampo Crame ang kanhi senadora human mapaubos sa mandatory nga medical nga eksaminasyon.
Ang kanhi senador gidakop niadtong tuig 2017 tungod sa tulo ka kasong naglambigit sa gidili nga drugas apan una nang gibasura sa hukmanan ang duha niini ka mga kaso una niadtong Pebrero 2021 ug ang ikaduha niadtong Mayo 12 diin apil sa giabsuelto mao ang kuyog-kuyog sa senadora nga si Ronnie Dayan.
Sa walay paghisgot sa merito sa kaso sa kanhi senadora, kasagaran sa mga akusado nga nakapiyansa, giabsuwelto sa kaso nga ilang giatubang tungod kay usa sa mga rekisitos nga makapiyansa ang akusado sa kasong kapital ang silot mao nga dili ligon ang ebidensiya batok kaniya.
Sa kapital man god nga kaso sama sa gidili nga drugas, ang akusado dili poyde nga makapiyansa gawas lang kun human sa pagtimbang-timbang sa husgado sa petition nga makapiyansa nga giduso niini, huyang ang ebidensiya batok kaniya maong tugotan siya nga makapiyansa.
Mao nga ang pagtugot sa hukmanan sa kanhi Senadora nga si Leila de Lima nga makapiyansa posible nga dalan na kini ngadto sa hingpit na niini nga kagawasan.
Hinuon posible pod nga ang pagkapiyansa sa kanhi senadora bonga kini sa iyang pagpaabot nga mailisan ang administrasyong milutos kaniya og bagong administrasyon nga mahigalaon o walay personal interest sa kaso nga gipasaka batok niya.