Ikakatloag-duha nga Domingo sulod sa tuig Mga Pagbasa Kin. 6;12-16/Sal. 63/1 Tes. 4;13-18/Mt. 25;1-13
Maayong Balita
Ang seremonyas sa kasal kaniadto tagdugay gyud mahuman. Detalyado kaayo kini mao nga ang pamanhonon malangan gyud sa pag-abot sa iyang panimalay kuyog sa iyang asawa.
Katungdanan sa mga ulipon ingon man sa mga kaubanan sa kasal nga magtukaw aron sa pagpaabot kaniya kay wala hisayri ang tukmang panahon ug takna. Sa atong ebanghelyo karong Dominggoha atong nakita ang napulo ka mga dalaga.
Maalamon ang lima samtang danghag ang lima. Ang mga maalamon nakapangandam og igong lana samtang ang mga danghag nahutdan sa ilang lana.
Ulahi na ang tanan kay sa dihang sila nigawas aron magpalit og lana alang sa ilang mga sulo nasirad-an na ang ganghaan, wala na hinuon sila makatambong sa kombira sa kasal.
Kasinatian
Dunay duha ka matang sa pagpaabot. Ang active nga pagpaabot ingon man ang passive nga pagpaabot. Ang active nga pagpaabot nagpasabot nga duna kay gibuhat in between sa actual nga pag-abot sa imong gipaabot. Sama pananglit sa usa ka estudyante nga nagpaabot sa exam magtuon siya samtang nagpaabot sa petsa sa exam.
Ang passive nga pagpaabot naghulagway sa usa ka tawo nga nagmika samtang wala pa moabot ang iyang gipaabot. Sama sa usa ka tawo nga nagpaabot sa iyang bisita imbis manglimpiyo sa iyang pinuy-anan wala siyay laing gibuhat gawas sa pagmika.
Lihok
Wala kita masayud sa takna ug panahon nga moduaw ang atong Ginoo kanato.
Ang mahinungdanon nga alerto kita sa tanang panahon ug nga himoon natong busy ang atong kaugalingon sa mga butang Diosnon. Dugang pa, dili paigo ang pagtuo kinahanglang ang pagtuo anaay sentido komon.
Pangamuyo
Tanan: Ginoo himoa kaming andam nga magtukaw aron ikaw among mahimamat. Himoang mabuka ang among mga mata sa mga kamatuoran nga ikaw lamang ang makahatag.
Himoa kaming malagsik sa pakigmamat sa imong ikaduhang pag-anhi dala ang paglaum ug makiangayong hukom nga sibo sa among kahimtang. Amen.