Magsisibya gipatay

Laing magsisibya ang gipusil patay sa wala pa mailhi nga mamumuno niadtong adlaw nga Domingo, Novembre 5, 2023.

Ang gipusil patay mao si Juan Tumpag Jumalon, 57 anyos, ug station manager sa 94.7 FM Gold Radio nga nakabasi sa Calamba, Misamis Occidental. Ang biktima nga nailhan sa iyang mga tigpaminawan nga si DJ Johnny Walker mao usab ang tag-iya sa sibyaanan nga iyang gidumala.

Si Jumalon mao ang ikaupat nga sakop sa medya nga gipatay ubos ning administrasyon ni Presidente Ferdinand Romualdez "Bongbong" Marcos Jr. Ug ika 199 sa mga sakop sa media nga gipatay sukad niadtong tuig 1986 sigun sa talaan sa National Union of Journalists of the Philippines (NUJP).

Ang pagpatay ni Jumalon nakita sa tibuok kalibotan tungod kay gihimo kini samtang naka-live broadcast siya ug naka-live streaming sa social media.

Way kahadlok ang mihimo sa krimen tungod kay ang krimen iyang gihimo sulod mismo sa sibyaanan nga naa ra usab mahimutang sa gipuy-an sa iyang biktima.

Walay kalibotan si Jumalon nga kutob nalang niadtong adlawa ang iyang kinabuhi tungod kay wala siya magtuo nga ang tawo nga nagpatuo nga magpasibya modiretso diay sa pagpusil sa iyang ulo ug mikuha pa sa iyang bulawan nga alahas.

Ang pagpusil kang Jumalon sulod pa sa mga adlaw diin gipatuman ang bun ban tungod sa bag-o pa lamang nahuman nga Barangay ug Sangguniang Kabataan Elections. Maong isog ug wala gyoy kahadlok ang krimenal tungod kay gawas nga gun ban, gihimo pa gyod ang krimen sulod sa pinuy-anan sa iyang biktima.

Gikondinar ni Presidente Bongbong Marcos ang laing kaso sa pagpangataki ngadto sa sakop sa media ubos sa iyang administrasyon. Gawas sa pagkondinar, iya usab nga gipalihok ang mga ahensiya sa gobiyerno aron mahatagan og kasulbaram ang nahitabong krimen.

Samtang gipaningkamotan sa gobiyerno ang pagsulbad sa kaso sa pagpatay sa magsisibya pero dili nato mapadaplin ang atong mga kabalaka nga basin mahiapil ug madugang napod kini sa mga kaso sa pagpangataki sa medya nga wala masulbad sa kapolisan.