Padayon pa nga gipatuman ang “gun ban” nga gimando sa Commission on Elections tungod sa bag-ohay pa lang nahuman nga Barangay Elections.
Bisan og human na ang elections, apan padayon pa nga gipatuman ang gun ban ug unya pa kini mapupos karong Nobiyembre 29.
Kadtong mga tawo nga matinumanon sa balaod, sama sa mga sakop sa media, mituman gyud sa balaod nga dili na magdaladala og armas atol sa gun ban period.
Apan pakyas ang atong kapolisan sa pagsiguro nga ang ang mga kriminal nga nagsuroy-suroy wa na magdala og armas. Tungod niini, nabutang sa peligro ang kinabuhi sa mga tarong.
Tan-awa ang nahitabo sa radio broadcaster nga si Juan Jumalon nga naila sa radio name nga John Walker nga gisu’d ra sa kriminal samtang nagprograma sa iyang announcer’s booth.
Makahatag kini og leksiyon ngadto sa mga hard-hitting radio announcer nga samtang dili kamo magdaladala og armas, apan ayaw’g kumpiyansa.
Ilabi na sa sitwasyon ni Jumalon nga ang iyang studio anaa ra mahimutang sa iyang balay, way nagdili kaniya sa pagdala og armas bisan anaa siya sulod sa iyang announcer’s booth.
Ang National Union of Journalists of the Philippines (NUJP) miingon nga dili angay’ng magtipig og armas ang usa ka radio broadcaster, apan moingon ko nga sayop sila.
Ngano man? Si radioman Cirse “Choy” Torralba kaniadto gipusil samtang diha siya sulod sa iyang sakyanan human gyud sa iyang programa sa radio.
Tapsing ra ang pagkaigo ni Choy sa abaga, apan ang tawo nga mipusil niya, naglakaw paduol sa sakyanan kay aron tiwasan siya.
Kay si Choy duna may lisensyado nga snub-nosed revolver, abtik niya kining gigamit og gipabuthan ang kriminal, mao nga pagkasayod sa kriminal nga armado si Choy, tulin pa sa manatad nga nakasibat. Wa mamatay si Choy niadtong higayona.
Si Allan Dizon, reporter/photographer sa The Freeman/Banat News, gipusil apan wa maintimano, ug nakadagan pa unta, apan gisundan sa nagpusil niya.
Nagpanawag na lang og tabang si Dizon samtang ang kriminal nagkaduol niya, kay wa man siya’y armas. Kon may armas pa si Dizon, aw napatay niya ang kriminal.
Ika-199 si Jumalon nga sakop sa media nga gipatay dinhi sa Pilipinas gikan niadtong 1986, ug ika-upat sukad nga si Presidente Bongbong Marcos miasumier sa katungdanan.
Nindot unta nga dunay balaod nga kadtong mga tinuod gyud nga sakop sa media, way labot ang mga komedia, hatagan unta og benepisyo nga dili dako ang pangayoong bayad gikan kanila sa pagkuha og Permit to Carry Firearms Outside of Residence.
Maayo unta og dunay mga magbabalaod nga makahunahuna niining akong sugyot.