Pagbisto sa planong kudeta
Way nangutana ni AFP Chief Romeo Brawner. Boluntaryo niyang gisulti nga dunay giplanong kudeta batok ni Presidente Ferdinand Marcos Jr. Wa niya kuhaa ang kasayuran gikan sa tumoy sa iyang buhok. Niangkon si Brawner nga iyang nailhan ang pipila ka retiradong mga opisyal sa armadong kusog nga nagplano sa pagpalagpot sa presidente.
Way nangintriga nga mga sakop sa media nga nilit-ag og pangutana ni Brawner. Si Brawner maoy nitanyag sa makapakugang nga mga detalye: Nangumbinser na ang mga tigpasiugda sa aktibo nga mga sundawo sa pagkuyog sa kalihokan sa pagtay-og sa nasudnong liderato.
* * *
Gipabuhagay ni Brawner ang tanang kasayuran atol sa iyang diskurso sa pag-ilis sa liderato sa Western Mindanao Command sa Armadong Kusog. Giawhag niya ang kasundalohan sa pagpabilin nga matinud-anon sa chain of command. Nipasidaan sab nga kon may aktibong mga sundawo nga moapil ilang badlungon sa labing daling panahon.
Pero sa samang diskurso nikumpisal si Brawner nga iyang gikasulti ang pipila sa mga tigpasiugda sa giplanong kudeta. Nga iyang gitambagan nga samtang ilang katungod ang pagprotesta di angayng apilon ang kasundalohan nga aktibo pa sa serbisyo.
* * *
Ambot nganong way nakasulti ni Brawner nga ang pagplano og kudeta di malinawon nga porma sa protesta nga gi-garantiyahan sa mga balaod. Ambot nganong wa niya ipadakop ang mga tigpasiugda nga nitug-an niya sa ilang pagpasiugda sa destabilization plot batok sa gobiyerno.
Human sa diskurso, gipasabot ni Brawner sa media nga di pa lapad ang kalihokan. Pero siya ra sab ang nibutyag nga dunay aktuwal nga pagsuway sa pagpa-apil sa aktibong mga sundawo sa mga protesta niadtong Septiyembre 21.
* * *
Usa ka adlaw human sa diskurso ni Brawner, gibawi sa tigpamaba sa Armadong Kusog nga way aktuwal nga hulga sa kudeta. Matod niya igo lang gipahinumdoman ni Brawner ang kasundalohan sa ilang katungdanan sa pagpanalipod sa gobiyerno.
Wa ba lang matarung sa pagsuwat ug paglitok ang diskurso ni Brawner? Nasobrahan ba lang ang mga sakop sa media sa paghubad sa iyang diskurso? O igo lang nitaho si Brawner sa mga panghitabo sa ilang organisasyon pero wa siya kaamgo sa kadako sa yagaw nga mamugna, kay nakapapugwat sa katawhan ang kaseryuso diay sa hulga?
* * *
- Latest
