Nipasabot si Presidente Ferdinand Marcos Jr. nga gipangunayan niya ang pagdumala sa Department of Agriculture (DA) aron nga mapalihok niya ang kinatibuk-an nga makinarya sa gobyerno sa:
· Pagpahimutang sa tanang kausaban nga gikinahanglan sa burukrasya sa DA;
· Pagpalambo sa produksiyon sa bugas humay ug ubang mga produkto sa agrikultura;
· Paghapsay sa supply chain aron mas sayon para sa mga mag-uuma ang paghatod sa ilang mga produkto ngadto sa kamerkadohan; ug
· Paghimong abunda sa suplay ug barato sa presyo aron maabot sa tanang konsumidor, apil na sa labing kabos nga mga pamilya.
* * *
Human sa usa ka tuig ug upat ka buwan, nibiya si Marcos sa DA nga:
· Way tambung-tambong sa mga tigom sa DA pagsulbad sa nagsunod nga mga krisis sa asukar, sibuyas, ahos ug bugas humay;
· Mas mahal ang mga presyo sa asukar, sibuyas ug labi na sa bugas humay bisan sa price ceiling nga iyang gipatuman niadtong Septiyembre; ug
· Mas naglisod ang kinabag-an sa mga konsumidor sa pag-apas sa paspas nga pagsulbong sa presyo sa mga produkto sa pagkaon ug ubang inadlaw nila nga mga panginahanglan.
* * *
Ang gitudlo ni Marcos nga bag-ong agriculture secretary, ang bilyonaryo nga si Francisco Laurel Jr., iya dayong gitahasan sa mosunod nga mga sugo:
· Pagpaubos sa presyo sa tanang produkto sa agrikultura (sa way pagpasabot nganong napakyas siya paghimo ini ginamit ang tanang gahom isip kinatas-ang opisyal sa gobyerno); ug
· Pagpalambo sa produksiyon sa agrikultura (sa way pagpangayo og pasaylo sa iyang kapakyas pagtuman ining maong pasalig sa niaging kapin na sa tuig).
* * *
Di mahitabo nga angkunon ni sa Malakanyang, pero ang mosunod mao ang tinuod nga accomplishments ni Marocs sa iyang pag-insistir pagdumala sa DA:
· Iyang atras-abante nga mga desisyon sa importasyon sa asukar maoy nakamugna sa krisis sa asukar niresulta sa kanihit sa suplay ug pagsulbong sa presyo ngadto sa P125 kada kilo;
· Iyang kapakyas pagbadlong sa smuggling sa mga produkto sa agrikultura, nga gidudahang gipaluyohan sa mga negosyante nga labing suod sa iyang administrasyon, maoy nakapasamot sa krisis sa sibuyas (nga niabot og P720 kada kilo niadtong Disyembre); ug
· Iyang pataka nga pagpahamtang sa price ceiling niadtong Septiyembre nakapasamot sa kamahal sa bugas humay.