Sementeryo gisirad-an sa napilde nga kandidato?

Nakuratan intawon ang mga tawo nga niduaw sa sementeryo sa bukirang barangay sa Cambinocot dakbayan sa Sugbo niadtong adlaw sa mga Santos Nobiyembre 1 human adunay gikolektang bayad o entrance fee ang ilang sementeryo. Sumala pa nga P50 alang sa mga residente sa barangay ug mas dako ang mga opisyal ug kawani sa barangay nga moabot sa P100.

Naresolbar ra hinuon ang isyu human gipahunong sa barangay ang collection kay wala man daw business permit gikan kanila ang pagpahigayon sa collection sa mga mosulod sa sam-ang. Gibalik usab sa tag-iya sa luna ang gipabayad sa mga nisulod sa sementeryo.

Ang responsable niini ang tag-iya sa luna kinsa nilansad pagka konsehal sa nakalabay ng eleksyon apan napilde maong gitoohan sa mga tawo nga tungod sa iyang kapakyasan sa politika nanimalos kini pinaagi sa pagpangolekta na og bayad sa road access padung sa sam-ang.

Akong naestorya si Floro Arconada, ang tag-iya sa luna niklaro nga dili tungod sa iyang kapildehan ang iyang gihimo kon dili gusto lang niya kuhaon ang pagtagad sa mga opisyal sa barangay nga asikasohon na ang deed of donation sa iyang mga ginikanan aron hingpit nang matugyan ngadto sa kagamhanan ang luna nga gibutangan sa sementeryo aron usab dili na sila ang mag-abaga sa bayronon sa buhis.

Sa pagkakaron sila pa kuno ang nagbayad sa buhis sa 10 thousand square meters nga luna nga gihimong sam-ang. Gani usa sa iyang katuyoan sa pagsulod unta sa public service ang pagpadali sa pag- asikaso sa donasyon sa yuta. Ang iyang mga ginikanan ra kuno ang nag donate ug wala ang ubang mga anak nakapirma isip pagtugot sa donasyon. Mintras dili pa mahapsay ang deed of donation mahulog nga sila pa gihapon ang tag-iya sa yuta. Matud niya nga ang nahimutangan lang sa sementeryo ang naapil sa deed of donation walay labot ang luna nga gihimong road access padulong sa sulod sa sam-ang. Nagpasabot nga pribado kini og mamahimo niyang sirad-an. Gawas lang kong paliton sa baranggay o sa city hall ug kong ibaligya ba niya.

For humanitarian consideration angayan nga magsabotsabot lang unta ang mga opisyal ug ang mga molupyo kay sila ra man ang maapektohan sa mga panghitabo nga sama niini. Mag-unsa naman lang ang mga patay nga ilubong sa menteryo didto kong hingpit sirad-an ang dalan kay pribado man, ipalupad ang mga minatay padung sa ilang lubnganan?

Sakit man gyud pud tuod ang kapildehan sa eleksiyon maong makaingon ko nga kabahin sa iyang kapakyasan ang pagpangolekta sa bayad sa mga moagi sa ilang luna apan maayo lang gani kay nakaamgo ang tag iya nga tawo siya nga mobati usab sa sama niyang tawo nga nagkinahanglan usab sa pagsabot.  

Sa habig sa barangay, bag-ohay lang kuno nila nadawat ang mga papeles sa donasyon ug ila na kining gilihok. Angayan lang pud nga ipadali kini kay ang mga tawo ang masakripisyo kong pangitaan og buslot sa deed of donation kay adunay gihambin nga kaligotgot ug dili nalang ipadayon ang paghatag sa yuta nga alang sa kapahuwayang dayon.

Kong tinuod man nga nasakitan nga napilde, move on nalang ug pangandaman ang sunod nga kombate kay basin diay buligan sa kapalaran modaug na sa umaabot nga piniliay ug makasebisyo sa katawhan.