Kadaghanang opisyal, talawan

Sa pagsuwat ko niini kagahapon, nagpadayon pa ang pagbotar sa katawhan nga mipili sa paborito nilang mga kandidato nga gusto nila nga maoy modumala sa tagsatagsa nila ka barangay.

Unta, kadtong mapilde nga mga kandidato dili na lang magsige g yawyaw ug ipasangil nga ang ilang kapildehan nahimo kay nanikas ang ilang mga kaatbang.

Ang tinuod, bisan pa og ang imong kaatbang  namalit  og mga botos aron makadaog, ang imong mga dumadapig mobotar gyud nimo kon tinuod sila nga midayeg sa imong serbisyo.

Nakahinabi ko og kawani sa usa ka mall dinhi sa Sugbo kaniadtong Domingo, ug gitug-anan ko niya nga mipalta siya sa iyang trabaho kagahapon.

Abi ninyo og ngano? Gikuha siya nga poll watcher sa usa ka kandidato pagka kapitan. Abi ninyo og pilay gisaad nga ibayad kaniya? Napasiga ang akong mga mata kay P1,500 ang bayad sa pagka watcher.

Ang tinuod, gisultihan ko sa akong amigo nga opisyal sa Comelec nga kon ang usa ka kandidato daghan og kwarta, modaog gyud siya pinaagi sa  legal  nga pagpamalit og botos.

Wa idili nga mobayad ka og watchers aron kunohay motabang nimo sa pagbantay nga dili ka matikasan sa election, moreport nimo kon makakita siya g pagpanikas.

Gisukna nako ang maong kawani sa mall kon asa siya mobotar, ug giingnan ko niya nga natural kuno mobotar gyud siya sa kandidato nga nagsuhol niya.

 Mao na diha nga kon kandidato ka nga way kwarta, maglisod ka gani sa pagpahigayon og miting de avance, ingon man dili ka makapakaon sa imong mga watchers.

 Samtang nagpadayon ang election, nakakita ko kagahapon nga adunay mga tawo nga magsulod-gawas sa heaquarters sa usa ka politiko ug nagbitbit og mga pagkaon.

Mangutana mo legal ba ni? Samtang ang balaod sa Comelec nag-ingon nga gidili ang pagpanghatag og bisan unsa, apil ang pagkaon sa mga botante atol sa election, unya kay moingon man ang kandidato nga ila kadtong mga poll watchers?

* * *

Lauman nako nga ang makadaog nga mga opisyal sa barangay, kinahanglan unta nga motuman sa balaod nga dili mahadlok nga may mga tawo nga masuko kanila.

Sa akong paglibot-libot sa kabarangayan dinhi sa urban barangays sa Dakbayan sa Sugbo, wa gyud ko makakita og barangay nga nakapitol sa abusado nilang mga lumolupyo nga migamit sa aseras isip kabahin sa ilang balay.

 Wa kini tagda sa mga opisyal sa barangay nga nahadlok sila nga kon masuko ang maong mga tawo, yam-iran unya sa sila sa adlaw sa panudya, nga mao ang election.