Pagmata, iboto ang ligdong

Gipaabot ang gatusan ka libo ka mga Pilipino ang mag-ambahan paingon sa nagkadaiyang polling centers sa nasud ugma, Oktubre 30, aron pagpili sa mosunod nga mga lider sa ilang barangay.

Ang barangay maoy nagsilbing frontliner sa  kagamhanan paghatod sa batakang serbisyo sa gobiyerno.

Kini maoy hinungdan nga sa higayon nga dunay mga katalagman ug dunay ayuda nga ipaabot ang gobiyerno ang barangay maoy tugyanan niini. Ang mga opisyal sa barangay maoy manglista kinsay angayang makadawat sa ayuda.

Sa ubang batakang serbisyo ang barangay maoy magsilbing taytayan ngadto sa lungsod, syudad o ba kaha sa nasudnong kagamhanan aron moabot ang mga mehoras ug uban pang programa ngadto sa matagsuok sa barangay.

Busa mahinungdanon nga ang mga opisyal sa barangay makamao unsaon paghimo nga moabot ang mga proyekto sa kagamhanan sa ilang barangay sanglit dili igo ang kaugalingong pundo sa barangay pagtubag sa ilang panginahanglan.

Kinahanglan nga ang usa ka opisyal sa barangay kugihan ug dili tamaran nga mangita og paagi aron pagdala sa mga proyekto gikan sa lokal ug nasudnong kagamhanan ngadto sa iyang barangay.

Aron kini mahimo importante sab nga makamao siya bisan pagsuwat nalang og resolution ug pagpreparar og program of work and estimate (POWE) nga usa sa mga batakang gikinahanglan kun mangayo ta og proyekto.

Kini maoy angayang himoong sumbanan sa mga butante pagpili sa mosunod nga mga lider sa ilang barangay.

Ayaw palingla sa tam-is nga mga pulong ug kanindot mokanta ug mosayaw sa usa ka kandidato panahon sa kampanya. Labi pang ayaw pahaylo sa kwarta nga ilang ihatag tungod kay ang kandidato nga mamalit sa butante siguradong kurakot.

Siguradong mangurakot na sa bisan unsang paagi kun makalingkod aron bawion ang iyang gasto. Ug dili niya kini mahimo kun honorarium ray iyang saligan busa ang posibling mahitabo mao nga kawkawon ang panudlanan sa barangay o ba kaha ang pundo nga alang unta sa kaayohan sa katawhan.

Mao nay hinungdan nganong dunay daghang magbagulbol nga dunay mga hinabang nga di moabot ug proyekto nga wa magkadimao.

Pagmata, pilia ang mga ligdong nga kandidato!