Ikakap-atag duha nga Adlaw

Diha sa Pakigbatok sa Yawa

Sukaranang Teksto

“Isul-ob ninyo ang tanang kahimanan sa gubat nga gihatag sa Dios kaninyo aron makasukol kamo batok sa mga panglimbong sa yawa. Kay wala kita makig-away batok sa dugo ug unod kondili batok sa mga dautang espirituhanong gahom diha sa kalangitan, sa mga pangulo, sa mga anaa sa gahom, sa mga daotang gahum nga nagmando ning kalibutan sa kangitngit.” (Ef. 6; 11-12)

Pasiuna

Gipahimangnoan ni San Antonio Abad ang iyang mga kaubang mga monghe ug mga Ermitanyo: “Ang pinakamaayong paagi aron pakigbatokan ang Yawa mao kining mosunod:

1.  Matinud-anon nga pagkinabuhi

2.  Hugot ug tibuok nga pagsalig ngadto sa Dios.

3.  Mahadlok ang yawa kun kita mag-ampo, mobuhat og mga buhat sa kaluoy, magsakripisyo, magpulaw diha sa pag-ampo, pagpuasa, paghigugma sa mga kabus, ang pagkamasinugtanon ngadto kang Kristo Jesus.

4.   Ang mga yawa  dili  buot nga mosulod kita sa langit. Dili sila buot nga mahiadto kita sa langit, ang dapit diin nahimo silang pakyas ug dili na mahitabo nga mosulod pa niini.

5.  Dili kita angay nga mahadlok sa paghasmag sa yawa.

6.  Atong dugangan ang atong pagpugong sa kaugalingon kay niining paagiha mamahimo kitang andam ug tagana ning maong pakiggubat.

7.  Pinaagi sa atong pagpuasa, makanunayong pag-ampo ug pagsalig sa Dios mahimo kaayo nato silang buntogon.

Pagpalawom

Unsaon man nato pagpanalipod ang atong kaugalingon gikan sa gahum sa kangitngit? Ania ang mga sugyot.

1.  Pagbiya sa kinabuhi sa sala.

2.  Kanunay nga pagkumpisal ngadto sa pari.

3.  Makanunayong pagsimba labina gyud sa mga piyestang iglilihi.

4.  Makanunayong pagpamalandong sa Kabubut-on sa Dios.

5.  Pagpuyo diha sa birtud sa kaputli.

6.  Pagpasaylo kanila nga nakasala batok kanimo.

7.  Pagbiya ug pagsalikway sa bisan unsang matang sa patuo tuo ug mga balansayon sa occult.

8.  Pagpanginlabot sa mga  kalihukan sa Parokya ug sa katilingban.

9.  Makanunayong pag-ampo ug pamalandong sa Pulong sa Dios.

10. Pagpuyo kanunay diha sa kahimtang sa Grasya.

Pangamuyo

Ginoong Jesus, panalipdi ako ug ang akong banay (kun mahimo litoka ang tagsa tagsa ka pangalan) gikan sa tanang mga sakit, kadautan, mga aksidente, ug kun ugaling usa kanamo ang gipadad-an og tunglo, daut ug uban pa, akong giisip nga walay mahimo kining maong mga tunglo nga gipadala pinaagi sa ngalan ni Kristo Jesus. Ug kun dunay mga dautang mga Espiritu nga gisugo batok kanamo, gihinginlan ko sa Ngalan ni Kristo Jesus ug gimandoan ko kamo nga moadto kang Kristo Jesus aron maoy magbuot kaninyo. O Ginoo ipadala ang imong mga balaang mga Anghel aron manalipod kanamo sa kanunay. Amen!

Kalihokan karong adlawa

Sugdi ang pag debosyon sa mga Balaang Anghel labina gyud ang Tulo ka mga Arkanghel nga sila si Miguel, Gabriel ug Rafael.