Lihok

Pito ka adlaw gikan karon eleksiyon na. Lahi ang eleksiyon karon tungod kay mano-mano kini. Dili kini pareha sa miaging nasudnon nga piniliay nga elektronik o hightech.

Ang Pilipinas misunod na sa laing kanasuran nga aduna nay hightech nga paagi sa piniliay apan wala pa maapil niini ang piniliay sa Barangay. Hinuon ang Commission on Election (COMELEC) naglaraw na sa paghimong elektronik sa piniliay sa barangay.

Tungod sa paghimong elektronik sa nasudnong piniliay nawala na ang reklamo sa kahinay sa pag-ihap sa mga boto tungod kay makina naman ang mohimo sa pag-ihap hinungdan nga mahibawan dayon ang resulta sa piniliay.

Nakuhaan napod ang kalangay sa pagbotar tungod kay dili naman magsuwat ang mga botante sa pangalan sa mga kandidato kay igo naman lang sila nga mag shade niini.

Apan ang reklamo sa palit sa boto nagpabilin tungod kay wala pa maimbento ang bisan unsang kahimanan nga makapaminos kun dili man makapawagtang sa palit sa boto.

Gani mas nahimo pang elektronik ang palit sa boto tungod kay ang palit sa boto sa pipila ka mga mikandidato gipaagi na sa remittances sama sa GCash, Maya, Paypal ug Palawan pay.

Ang lihok sa piniliay sa Pilipinas maingon nato nga advance na tungod kay elektronik na kini bisan tuod layo pa ang atong ka advance sa ubang kanasoran nga nakapaminos sa isyu sa intergridad sa resulta sa piniliay, apan minunot usab niini ang ka advance sa paagi sa pagpamalit og boto sa mga kandidato nga gustong moguba sa kabubot-on sa mga botante sa pagboto nga makapintal og boling sa integridad sa resulta sa piniliay.

Mao ni ang hagit sa Comission on Election (COMELEC) kun unsaon nila pagpahigayon ug piniliay nga ang resulta o integridad niini walay pintal sa pagduda. Hagit usab kini sa mga magdala sa renda sa kagamhanan unsaon pagpahigayon og limpyo nga piniliay.