'Ingna ang Mayor'

Kanindot kon mahinayon ang gikatakda nga pag-interview nako ni Mayor Michael Rama atol sa programa nga “Ingna ang Mayor” sa Sugboanon Channel.

Naghinamhinam ko nga makahinabi ni Mayor Rama kay giingnan ko niya nga “no holds barred” ang among interview.

Bisan unsay akong ipangutana kang Mayor Rama iyang tubagon. Dili sama sa ubang magpa-interview nga mohangyo sa media nga dunay dili iapil pagpangutana.

Pirmi nga isulti ni Mayor Rama nga kontra kaayo niya ang mga tawo nga malambigit og pangurakot ug mobulsa sa kwarta sa kagamhanan.

Wa koy pagduda nga si Mayor Rama dili gyud morisgo sa iyang dungog aron mangurakot, kay gusto niya nga sundon ang iyang apohan nga si Don Vicente Rama.

Apan dili imposible nga dunay mga kawani sa Cebu City government nga maoy mangilkil sa kwarta sa kagamhanan, ug dili lang kaayo maestrikto sa pagbantay.

Nadungog na nga dunay mga kawani sa City Hall nga nakakwarta kay gibulsa nila ang kwarta nga wa makubra isip cash assistance sa ubang senior citizens. Dunay mga tua na magpuyo sa lagyong dapit nga wa na makapauli dinhi sa Cebu City aron pagkubra sa ilang cash assistance. Labi na nga dunay mga senior citizens nga patay na.

Si Konsehal Nico Ballesteros Versoza sa Barangay Apas, dakbayan sa Sugbo mireklamo nga dunay mga senior citizen nga wa makakubra dayon sa ilang cash assistance kay milarga sila.

Pag-uli nila dinhi sa Cebu, miadto sila sa City Treasurer’s Office aron pagkubra, apan nakurat sila kay gikubra na man ang para kanila, ug may pirma na sa payroll.

Matud ni Konsehal Versoza nga ang maong mga senior citizens gipagawas sa City Treasurer’s Office ug gidala sila sa duol nga Senior Citizens Park, ug didto sila gihatagan og tag P3,000.

Tungod niadto, si Konsehal Versoza nga maoy chairman sa committee on social services sa barangay, mihimo og pakisusi, ug didto nahibaw-an niya nga sa payroll, diha pa ang nga’n sa iyang iyaan nga namatay tuig na kapin, ug nakakubra man gihapon.

Ang Fact-Finding Committee nga gimugna nang daan ni Mayor Rama aron moimbestigar sa mga binuang sa City Hall mipatawag og mga kawani sa Office of Senior Citizens Affairs (OSCA) ug Department of Social Welfare and Services.

Ang pangulo sa Fact-Finding Committee mao si Atty. Homer Cabaral nga kanhi regional director sa National Police Commission ug dunay duha ka abogado nga iyang mga kauban.

Nasakpan gyud sa imbestigasyon nga ang kanhi hepe sa OSCA ug duha niya ka kawani, nalambigit sa binuang. Apan samtang gitangtang ang hepe, ang duha sakop matud pa sa mireklamo kanato, anaa pa sila gihapon. Unsay himoon ni Mayor Rama niini? Atangi ninyo!