Pabor kong Cebu City Councilor Jose Lorenzo Abellanosa sa iyang pag-awhag sa Department of Education (DepEd) sa paghunong sa naandan sa mga magtutudlo sa pagsugo sa mga estudyante sa pagsumiter og projects ug assignments nga magkinahanglan og dugang gasto sa mga ginikanan.
Kasagaran sa mga ginikanan nipili sa mga eskuylahang publiko kay, sama sa kinabag-an sa katawhan, dili buhong ang ilang panudlanan. Naglaom sab sa pasalig sa konstitusyon, ang batakang balaod sa nasud, nga ang gobyerno mohatag og libre ug kalidad nga edukasyon sa tanang ang-ang para sa tanan.
* * *
Samtang gihimo sa DepEd nga boluntaryo ang tanang bayranan sa mga eskuylahan, bahala na kon wa hingpit nga mapatuman, obligado ang mga estudyante nga mosumiter sa tanang projects ug assignments nga kabahin sa mga leksiyon.
Lisod sabton nganong makabalibad ang mga estudyante sa lehitimong mga kontribusyon sa Boy Scouts of the Philippines (BSP), Girl Scouts of the Philippines (GSP), Philippine Red Cross (PRC), Anti-Tuberculosis Association of the Philippines (ATAP) ug Parent-Teacher Community Association (PTCA), pero di kalikay–bisan unsa kakabos–sa mas dagko nga gastohan sa mas daghan nga projects ug assignments.
* * *
Mahimong mangangkon ang DepEd nga ang projects ug assignments makatabang sa pagkat-on sa mga estudyante. Pero mouyon sab tingali sila sa mga eksperto sa edukasyon nga ang projects ug assignments di kinahanglan nga paliton o gastohan aron mahimong epektibo.
Mahimong mosumbalik ang DepEd nga ang mga politiko sama ni Abellanosa angayng motampo sa gastohan kon sinsero nga motabang sa mga estudyante. Pero sila untay labing unang moangkon nga mahimong makat-on ang mga bata sa way paghasol sa pitaka sa mga ginikanan.
* * *
Nakaseguro kong tarung ang kasagaran sa projects ug assignments. Pero tuguti nga akong ilista ang pipila sa mga gireklamo sa mga ginikanan nga nidangop namo:
• Gisugo ang mga estudyante sa pag-download sa letrato sa mga hayop gikan sa internet (gipaadto og internet cafe ang mga way koneksiyon sa ilang pinuy-anan) ug iprinta sa bond paper aron isumiter sa magtutudlo; ug
• Gipadala og piraso sa plywood pagsugod sa klase, pero nahuman na lang ang semestre way proyekto nga nahimo (nadunggan na lang sa mga estudyante nga nahuman nang balay sa magtutudlo sa Argao).
* * *