Gutom wala na pero 2027 pa

Nagpagawas ang Malakanyang og usa ka Kamandoang Ehekutibo Numero 44 nga pinirmahan ni Executive Secretary Lucas Bersamin.

Ang kamandoan nga gipagawas niadtong Oktobre 12, 2023 nag-establisar sa dakong programa sa pagkaon  nga gipasiugdahan sa administrasyon ni Presidente Ferdinand R. Marcos Jr.

Tumong ug tuyo sa food stamp program nga sa tuig 2027 wala nay pang gutomon sa katawhang  Pilipinhon.

Ang food stamp program nagtinguha sa pagpaubos o pagwagtang sa mga tawong kabus nga pang gutomon pinaagi sa paghatag kanila og monetary-based nga tabang  nga  dali pinaagi sa Electronic Benefit Transfer  Card.  Kining maong card magamit sa pagpalit og mga piniling pagkaon sa mga partner nga tindahan.

Ang Walang Gutom Food Stamp Program 2027 sa nasudnong kagamhanan pangolunahan kini  sa Department of Social Welfare and Development (DSWD) nga maoy responsible sa pagpatuman ug pagdumala sa social welfare development nga mga programa sa nasud.

Aron maseguro ang kalamaposan sa pagpatuman sa programa, ang DSWD gitahasan sa pag-ila sa mga mamahimong benepisyaryo ug sa pagpakigtambayayong sa mga benipisyaryo alang sa kaseguroan sa epektibo ug dali nga pagpangapod-apod sa food stamp aron magamit dayon kini.

Ang akong pangutana, magtinarong na kaha ang mga personahi sa DSWD sa pag ila sa mga benepisyaryo sa programa? Dili na kaha sila maghangad-hangad ug ibasi lang sa imahinasyon ang pagpanglista nila sa mamahimong benipisyaryo? Dili na kaha maapil niini ang mga dili angayan nga hatagan? Dili na kaha maapil niini ang mga paryente o kaliwat sa mga gitahasan sa pag ila sa mga benipisyaryo? Manghinaut lang ko nga ang tubag ning akong mga pangotana pulos negatibo.

Ang nag-unang programa sa gobiyerno alang sa pagkaon sa nasud nagtumong sa pagwagtang sa kagutom sa tuig 2027 busa agwantahon lang sa nato nga gipanggutom karon. Ampo lang ta nga sa upat ka tuig nga kagutom nga atong nasinati makaabot pa ta sa tuig 2027.