Duna gyuy mga tawo nga dili mahadlok gabaan sa paggamit sa imahen ni Santo Niño sa pagpanglingla aron sila makakuwarta.
Ang gipasabot nako mao kining mga tawo nga namaligya og imahen ni Santo Niño nga way sinena, ug gibunyagan nila og Santo Niño Hubad.
Naghimo sila og “page” sa social media ug diha sila mihimo sa kalihokan nga gisaway pag-ayo sa kadagkoan sa Simbahang Katoliko.
Nasayod sila nga kaliboan ka tawo ang miyukbo ug misalig kang Santo Niño mao nga gigamit nila kini sa pagpanguwarta. Giunsa nila sa pagpanguwarta?
Aron katuohan nga lehitimo ang “page” niining mga tawhana, migamit sila og mga hulagway sa Basilica Minore del Santo Niño. Aw, katoohan gyud tuod og legitimate.
Gipatuo nila nga dili nila ibaligya ang imahen ni Santo Niño nga hubo, way sinena, ug ang bayaran lang mao ang shipping fee aron madawat sa nanginahanglan ang imahen.
Pastilan, wa lagi ibaligya ang imahen apan ang bayad sa pagpadala pwerteng mahala nga tabla ra sab og gibayran ang imahen ni Santo Niño.
Kini maoy rason nga ang kadagkoan sa atong kaparian nag-awhag gyud sa katawhan, ilabi na ang mga devotees ni Santo Niño nga dili mopalit niining imahen nga way sinena.
Pastilan, wa na gyud tingali laing nahunahunaan aron makakuwarta kay gigamit man ang imahen ni Santo Niño sa ilang pagpanguwarta.
Gipatuo nila nga kon anaa ka niining maong Santo Niño nga hubad, way sinena, swertehon kuno ka. Ang tinuod, tabla ra og usa ka panamastamas ang ilang gihimo.
Sama ra gud na sa uban nga akong nakita nga ang imahen ni Santo Niño gihimong mora’g polis. Unta, undangon na nila kining paggamit sa imahen ni Santo Niño aron lang makakuwarta.
* * *
Magsugod na gyud karong adlawa ang kampanya sa mga kandidato sa pagka kapitan ug konsehal sa barangay, apil kadtong milansar pagka Sanguniang Kabataan chairman ug SK councilmen.
Nindot unta nga dili lang magdaotay ang mga kandidato, nga tuyoon gyud paghimo’g mga bakak aron daoton ang dungog sa ilang mga kaatbang.
Ang nindot nga matang sa kampanya mao nga ibutyag ra ngadto sa mga botante kon unsay imong buhaton sa higayon nga pilion ka sa katawhan nga maoy ilang opisyal.
Aw, kon dunay mga dili maayong binuhatan ang usa ka kandidato, pwede nga ibutyag kini sa katawhan apan dili maayong magtumo-tumo ug mga dili tinuod.
Dayon, mas nindot nga kon kinsa gani ang modaog sa pwesto kay maoy nakakuha og labing daghan nga botos, suportahan kini sa mga napilde. Ipakita nga sports mo, nga dili magdumot abi ka napilde kamo sa eleksyon.