Ikakatloag-Tulo nga Adlaw

Nganong magdumili ang usa ka demonyo nga mopahawa gikan sa lawas sa tawo?

Matud ni: Vladimir Savchuk

Sukaranang Teksto

“Unya miduol sa tago kang Jesus ang mga tinun-an ug nangutana kaniya: “Nganong wala man kami makapagula sa yawa?” Si Jesus mitubag: “Tungod kay wala man kamoy igong pagtuo, sultihan ko kamo; kun may pagtuo kamo nga sama kadako sa liso sa mustasa, makasugo kamo niining bungtora sa pagbalhin ug mobalhin kini. Pinaagi sa pagtuo walay dili mahimo Ninyo.” (Mt. 17;19-20)

Pasiuna

Matag usa nato bisan pa man sa atong pagka binunyagan ang mahimong biktimahon sa mga dautang Espiritu. Bisan gani ang Balaang kasulatan labina gyud ang mga synoptic gospels ang naghisgot man sa mga panghitabo diin ang atong Ginoo nihimo gyud og eksorsismo kanila nga nasudlan o dili ba kaha gisakit sa mga dautang Espiritu. Gani, ang atong Ginoo usab ang gisulayan man sa yawa samtang nangandam siya sa iyang misyon. Sulod sa kap-atan ka mga adlaw ug gabii. Dali ra gyud ang kaayohan.

Pagpalawom

Apan mahimo ba nga magdumili ang yawa sa pagpahawa? Ang tubag: Oo ug mamahimong langay ang kalingkawasan. Ang mga yawa kasagaran mga gahi og ulo. Tungod ning mosunod nga mga rason:

1. Dili demonyo ang imong gikaatubang. Mahimong ang imong gihatagan og atensiyon mao ang usa ka tawo nga dunay psychological disorder sama pananglit sa Dissociative Identity Disorder (DID). Adunay emotional wound sa karaang panahon. disintegrated ang pagkatawo gumikan sa trauma. Tinuod nga dunay naka assign nga demonic spirit sa matag disorder apan mas makatarunganon nga himoon ang malangkubong pagsusi sa kahimtang sa biktima. (Adunay linain nga pagpamaladong kalabot niini)

2. Kusgan ug gamhananan ang Demonyo. Dili tanang demonyo managsama og gahum. Basaha ang Mateo 12;45 diin giklaro didto nga kun makita sa mga unang demonyo nga napahawa sa ilang gipuy-an nga limpiyo na ug maayo nang puy-an molakaw sila ug motawag og mas gamhanan pa. giisip nilang ilang balay o teritoryo ang tawo mao nga mas molig-on sila gikan niini.

3. Kuwang o haguka ang pagtuo ngadto kang Jesus. Ang mga tinun-an ang nahiagom man sa kapakyasan sa paghingilin sa mga yawa. (mt. 17;20). Sayon ra ang pag-ingon nga mituo kita kang Kristo Jesus apan ang pangutana ato ba kining gipakita diha sa atong kinabuhi?

4. Huyang ka lang. dili paigo ang puasa ug pag-ampo hinunoa mahinungdanon usab ang pagpanaw kuyog ang atong Ginoong Jesus sa atong kinabuhi.

5. Walay tukmang Heart Conditioning ang Biktima. Nga sa ato pa, kun kini giharian pa sa pagdumot ug ang pagdumili sa pagpasaylo ug ang kapasayloan wala niya dawata mamahimong mas malangay ang proseso. Negativities and unforgiveness attracts demons.

Pangamuyo

Ngadto kang San Miguel Arkanghel

San Miguel Arkanghel, panalipdi kami sa gubat, mahimo kang taming batok sa gahum sa dautan. Gapsuon unta siya sa Ginoo nangamuyo kami. Pinaagi sa Diosnong gahum itambog sa impiyerno si Satanas ug ang tanang dautang Espiritu nga naglibot libot dinhi say uta, nangita sa kapildihan sa mga kalag. Maghari unta si Kristo sa among kasingkasing, sa among kabanayan ug sa tanang dapit sa kalibutan, karon ug hangtud sa kahangturan. Amen.

Kalihukan karong Adlawa/Praktikal nga Sugyot

1. Pangutan-a nganong nagdumili man sila sa pagbiya?

2. Ang pagdumili sa pagpasaylo. Dinhi magpabiling lig-on ang demonyo o mga demonyo.

3. Ipasusi ang ilang pinuy-anan basin naa didto ang mga butang o kabtangan nga nahimong ganghaan sa maong infestations. Mga dreamcatchers, oujia boards, habak, anting-anting, padugo ug uban pang mga balansayon nga supak sa atong pagtulon-an sa atong pagtuong Katoliko. Labaw sa tanan, ang pagpuyo diha sa kinabuhi sa sala.

4. Tawga ang mga anghel aron motabang. Sila kadtong mga ministering spirits. (Heb. 1;14)

5. Gapusa ang mga demonyo ginamit ang binding prayers aron siya dili na gyud makalihok. Tumong niini aron mamahimong normal ang pagkinabuhi sa biktima.

Hinumdomi:

Ang tumong ning maong pagpangalagad mao man nga ang biktima mas mapalawom pa gyud unta ang iyang relasyon ngadto sa Dios ug wala nay lain pa. Ang pangalagad sa kalingkawasan dili mahitungod sa yawa nga naghasol sa biktima kondili mahitungod kini sa gugma sa Dios nga mas nilabaw pa kaayo sa gahum sa dautan.