Kongreso dili pareho
Milutaw ang tinuoray'ng bulok sa Kongreso diha sa ilang pagtuki kinsa ug unsa mang ahensiyaha sa gobiyerno ang angay rang gahinan og minilyon-binilyong confidential fund (CF)?
Ania ang 2023 proposed confidential and intelligence budget nga gihangyo sa nag-unang upat ka buhatan sa kagamhanan: Office of the President (OP), P2.2B; Office of the Vice President (OVP), P650M; Senate, P330M ug House of Representatives, P1.6B.
Niining upat, si Vice President Sara ‘Inday’ Z. Duterte-Carpio mao ray gitabangag makmak sa taga Makabayan Bloc, kinsa morag kinsang limpiyohang mangangalad sa katawhan, haskang grabehang nakagisa ni Inday pagpangutana asa mopaingon ang maong OVP P650M CF?
Hagbay ra baya natubag ni Inday ang maong mga pabalikbalik na lang nga pangutana sa mga nagtakobang walhong grupo. Sama sa nagasto na nga 2022 P125M CF, gamiton ang gihangyong P650M CF sa padayong pagprotehir sa seguridad sa tanang kabataan nga maoy target sa NPA recruiters diha sa mga eskuylahan, diin may mga magtutudlong maoy gitudlo ang ideyalismo sa komunismo aron magbaton og kasuko ang mga tinun-an batok sa atong gobiyerno.
Hinungdan, makahimangod ang pinaleng desisyon sa Kongreso – ang pagbasura sa P650M CF’s request sa OVP. Kay inay mosuporta si House Speaker Martin Romualdez ni Inday, siya man hinuon ang nangusog nga tangtangon kini ug-i-realign na lang sa mga ahensiyang makatabang pagpalig-on sa atong puwersa diha sa giatubang tang suliran sa West Philippine sea.
Ang nakaparat mao: ang Office of the President P2.2B CF nga wala itug-an ang klarong padulngan, wala gyoy mikuwestiyon. Ang Senate P330M CF nga wala ihatag ang detalye asa paingon, walay kongresistang misurangsurang. Samtang ang House of Representatives P1.6B CF ni Martin, kinsa nakit-ang nakigmiting sa mga walhon, wala gyoy mibaraw! Fair ba kini sa kabahin ni Inday, kinsa naningkamot nga mahatagan niya kitag luwas ug bag-ong nawong sa Pilipinas nga kapuy-an? Sala ba diay ang pagtuman sa iyang gisaad?
Kon hatagan man sa Kongreso ang opisina sa Presidente, Balay-Kongreso ug Balay-Senado og CF, nganong ihikaw man kini ngadto ni Inday nga namatud-an nang usa ka honest-maayong mangangalagad? Nagpaila ba, nga atong Kongreso adunay pinalabi? Bahala nag ang ‘kumokontra sa confidential fund ay kalaban ng bayan?’
- Latest
