Nanghatag og ayuda nga tag P10,000 ang National Housing Authority sa mga nasunogan sa Barangay Quiot, Cebu City. Gawas sa salaping cash nakadawat usab og groceries ang mga nasunogan.
Nasayran ang pagpanghatag og ayudang salapi ug groceries dihang nakadawat og komunikasyon ang Barangay gikan sa National Housing Authority nga nangayo og sertipikasyon sa barangay mahitungod sa pagkalihitimo sa mga nakalista nila nga benipisyaryo.
Nakita sa lista ang mga pangalan sa mga tawo nga wala nasunogan. Taga-NHA ang nag-validate ug nag- inspeksiyon sa mga tag-iya sa balay nga nasunogan, apan ang kapitan sa barangay ang pasertipikahon sa ilang lista.
Sa dihang gipahibawo sa sugilanon igo lang miingon ang NHA nga kinahanglan nga aduna gayoy mangosog sa pagreklamo.
Ang ginganlan og JK sa NHA dili na motubag kun imong tawagan. Usahay dili na pud mobagting ang iyang telepono.
Ang pangutana, unsa ba ka sensiro ang National Housing Authority sa ilang pag-validate sa mga benepisyaryo sa ilang programa?
Kun tinuod pa sila nga nag-validate og nag inspeksiyon sa mga nasunogan sa Sitio Santo Niño sa Barangay Quiot, nganong ila man nga giapil ang mga tawo nga wala nasunogan ug kun apil man sila sa nasunogan, pariha lang sila nga nagpuyo sa usa ka balay nga nasunog tungod kay mao ra sila nga pamilya.
Tungod kay wala mag-imbestigar o mag-inspeksiyon o mag-validate sa mga claimant nga nasunogan, gitukob ug gilamoy lang pod dayon sa NHA ang mga papeles ug mga dokumento nga gisumitir sa mga tawong mapahimuslanon ug mangingilad?
Ang nakadimalas kay human gisultian sa sugilanon sa pangilad, ang NHA mangita pa og tawo nga mobarog. Nganong dili man moadto sa dapit nasunogan ang mga taga NHA aron ila gayod nga mapangutana ang mga silingan sa mga nasunogan? Tungod ba sa ilang pagkatapolan?
Kun wala sila makatultol sa Sitio Santo Nino sa Quiot nga nasunogan, puwede ra sila modangop sa barangay aron sila makuyogan aron ila kining matultolan.