Pito ka Ulohang Sala: Kalaog
Sukaranang Teksto
“Ayaw pakighugoy-hugoy sa mga palahubog ug mga ulit. Kay ang mga palahubog ug mga ulit mosangpot ra sa pagkawalay nahot. Kun magpunay ka lang og kaon ug katulog, magkagidlay ka sa dili madugay.”(Pan. 23;20-21).
Pasiuna
1. Ang kadalo nagpasabot man og dili makiangayon ug naghinobrang pagkaon ug pag-inom.
2. Mga timailhan sa usa ka tawong laog matud pang Sto. Tomas de Aquino
a. Dinalian
b. Dinaghan ug dinagko
c. Nanghinobra
d. Lamian gyud ang tuyo bisan og dili na makaayo sa lawas
3. Ang mga bunga sa kalaog
a. Naghatag lamang kini og dili tinuod nga kalipay ni katagbawan.
b. Ang naghinobrang pagkaon ug pag-inom maoy makapahimo sa mga hingtungdan nga moambit sa mga walay unod ug hinungdang pakigtabi sama sa libak ug pangdaut sa uban.
c. Kahugawan labina kun dunay uban nga motuyo og suka sa kinaon aron mokaon na pud pag-usab.
d. Mamahimong luya ang panghunahuna ug dili na hinuon maantigong makapamalandong sa binuhatan. Mahimong mabuhat ang mga binuhatan nga makadaut sa kaugalingon ug sa uban gumikan sa naghinobrang inom.
e. Mahimong lisud ang pag-ampo ug pagtuon kun naghinobra pud kita kabusog.
Pagpalawom
Kining maong sala nagasukad sa HEDONISMONG PILOSOPIYA nga nagkanayon: “Kaon, inom ug paglipay kay ugma ikaw mamatay!” Kining maong sukaranan sa moralidad dili gyud makaayo. Ang kalaog usa man ka dakong batok sa birtud sa PAGKAMAPUGNGANON (Temperance).
Pangamuyo
Sa ngalan ni Jesus nga Nazaretnon gihinginlan ko ikaw Beelzebul ang demonyo sa kalaog nga niulipon Kanako! (3x) Amahang Langitnon himoa akong magmapugnganon sa akong baba diha sa pagkaon. Nga ako untang saulogon ang mga gasa nga imong gihatag Kanako. Dili unta ako mamahimong laog ug dalo, hinunoa gikan sa daghan mong mga hatag maantigo unta akong mopaambit niini labina gyud sa mga mas nagkinahanglan pa kay Kanako. Amen.
Kalihukan karong Adlawa
1. Kaon apan ayaw pagbusog (sugyot ni Anhing Ricardo Cardinal Vidal, DD).
2. Kun tinugotan sa panahon, pagpuasa ug ang budget alang nimo gamita alang sa uban.