Ikakawhaag-Duha nga Adlaw

Pito ka mga Ulohang Sala: Kahakog

Sukaranang Teksto

“Kay ang pagkamahigugmaon sa salapi maoy tinubdan sa tanang kadautan. May mga tawo nga tungod sa kadako sa ilang mga tinguha nga masapian ang mahimulag hinuon sa pagtuo ug mahiagom sa daghang mga kagul-anan.” (1 Tim. 6;10)

Pasiuna

1. Ang kahakog mao man kadtong sala nga dunay dili makiangayong paghigugma sa salapi ug bahandi.

2. Ang kahakog mao kadtong sala diin buot nimong angkunon sa bisan unsang paagi ang manggad sa imong isig ka ingon.

3. Ang kahakog kun dili nimo mabantayan mao man mohinay hinay o gaut-ot sa imong kaugalingon aron himoon mo ang dautan bisan gani mismo sa imong kaugalingong banay.

Pagpalawom

1. Dili dautan ang paghupot og bahandi ug ang pagpangindahay niini labina kun imo kining gihagoan ug anaa sa hustong pamaagi. Ang nakapahimo niining dautan mao man nga gitugotan mo ang imong kaugalingon nga maulipon sa bahandi kaysa ikaw ang modumala kaniya.

2. Ang pagka diskontento sa usa ka tawo maoy nakapahimo niyang miserable. Ang tawo motrabaho aron makakaon apan dili siya matagbaw. (Ecc. 6;7).

3. Ang sekreto sa usa ka malinawong kinabuhi mao man ang pagka kuntento kun unsay anaa ug dili na mangandoy sa mga butang nga wala mahupti. (Ecc. 6;9). Ang Dios paigo na kaayo. Matud pang Santa Teresa sa Avila.

Pangamuyo

Unta Ginoo mamahimo unta akong mas mahigugma kanimo kaysa bisan unsang kabtangan o bahandi. Ayaw itugot nga maulipon ako niini. Ayaw itugot nga mamahimo akong hakog sa bisan unsa nga akong sanglit sayud man ako nga ang kamatayon maoy bugtong seguro ning kinabuhia. Sa ngalan ni Kristo Jesus gihinginlan ko ang demonyo nga si Mammon nga kuyog ning maong sala padayong nipukan sa kadaghanan namong mga tawo. Amen!

Kalihukan karong Adlawa

Buntoga ang kahakog pinaagi sa pagkamanggihatagon.