Pataka sa bugas humay
Nangangkon si Department of Trade and Industry (DTI) Secretary Alfredo Pascual nga 95% sa rice retailers sa tibuok nasud ang nituman sa price ceiling nga P41 kada kilo sa regular milled rice ug P45 kada kilo sa well milled rice. Kadudahan ang maong numero tungod sa kasibaw sa reklamo sa mga konsumidor nga wa nila igkita sa kamerkadohan ang gipasalig ni Presidente Ferdinand Marcos Jr. nga baratong bugas humay.
Mas kahibulongan ang kapakyas sa DTI pagkiha sa 5% nga giingong nisupak sa Executive Order 39 aron masilotan og hangtod sa 10 ka tuig nga priso ug hangtod P1 milyon nga multa.
* * *
Ambot diin kuhaa ni Pascual ang iyang numero kay 24% ra sa rice retailers sa Sugbo ug Central Visayas ang gitaho sa DTI nga nituman sa price ceiling ug nakadawat sa ayuda nga tag-P15,000:
• 17 sa 93 ka retailers sa Sugbo o 18%;
• Unom sa 70 ka retailers sa Bohol o 8%;
• 63 sa 148 ka retailers sa Negros Oriental o 42%; ug
• Usa sa 42 ka retailers sa Siquijor o 2%.
Walo ka retailers sa Cebu City nga nituman sa price ceiling natsambahan sa DTI sa kamerkadohan sa Carbon, Guadalupe ug T. Padilla; unom sa Consolacion ug tulo sa Minglanilla.
* * *
Pero nikumpisal ang DTI nga wa nila masusi ang tanang rice retailers. Sa Sugbo, ang nihit nilang mga inspektor kutob ra sa Cebu City, Danao City, Bogo City, Consolacion, Liloan, Compostela, Carmen, Catmon, Sogod, Tabogon, Borbon, Moalboal ug Minglanilla.
Wa kapasabot ang DTI nganong gilaktawan ang ubang kamerkadohan sa Metro Cebu (Mandaue City, Lapu-Lapu City, Talisay City, Naga City, Carcar City, Cordova ug San Fernando) ug ubang bahin sa probinsiya.
* * *
Sa kinatibuk-an, nanimaho nga pataka ang lagda:
• Kalibog kanus-a epektibo (effective immediately sa Agosto 31 ug Septiyembre 5);
• Hulga nga silotan ug sakmiton ang bugas sa tanang masakpan nga mosupak (way nakasohan);
• Pasidaan nga rondahon ang mga bodega sa rice cartel (way polis ni mayor nga nilihok); ug
• Pagbarato sa bugas sa tanang tindahan ug kamerkadohan (nagpabiling mas taas sa P41 kada kilo ang kasagaran sa regular milled rice ug mas taas sa P45 kada kilo ang well milled rice).
* * *
- Latest
