Karon ang fiesta sa dakbayan sa Danao sa ilang patron nga Sto. Thomas De Villanueva nga mao ang relihiyong kalihokan sa naasoy'ng syudad apan kagahapong adlawa gipahigayon nila ang ang kulturanhong aspeto nga mao ang Caransa Festival diin personal usab nakong natambongan.
Yano apan mabulokon ang ilang pagsaulog sa festival nga gihangop sa mga Danaowanon diin nagsugwak gyud ang mga tumatan-aw nga nisaksi sa street dancing sa napulo ka mga contingents gikan sa ilang mga barangay ug eskwelahan.
Bisan og daghan ang mga tawo apan disiplinado sila. Wala magduotduot kay sila na mismo ang molikay sa mga nagsayaw nga mga contingents. Nakadayeg ko sa ilang gipakitang taras nga dili na kinahanglan nga badlongon sa mga otoridad.
Matud sa akong mga nahinabi nga naghingapi ang ilang kalipay kay subling nasaksihan ang talan-awon nga gihikaw kaniadto panahon sa pandemic.
Ang uban kahilakon sa kalipay tungod kay nakabuhi gyud sa gapos sa pandemic ug ilang gipasalamatan ang ilang patron ug labaw sa tanan ang Ginoo sa paglikay kanila sa peligro.
Sukwahi sa imahe nga gun capital sa Sugbo ang gipakita sa katawhan sa Danao tungod kay gipatigbabaw nila ang kalinaw ug ang gugma sa usa'g usa. Mao usab kini ang tema sa performance sa mga contingents nga misalmot sa Caransa Festival.
Samtang sa panginabuhi sa katawhan, inanay na usab nga nisulbong, hinay man apan kanunay ug nilahutay luyo sa mga pagsulay nga ilang gisagubang mugna sa pandemic ug sa katalagman sama sa bagyong Odette. Usa ka maayong talan-awon ang akong nasaksiyan atol sa ilang kasaulogan, maayo unta kon dili lang kutob sa first impression sa unang pagtambong nako sa Caransa ang maayong gawi sa katawhan sa dakbayan sa Danao.
Ang kahiusahan sa ilang katawhan ug sa mga opisyal magbunga pa og malungtaron nga kalamposan ug kalamboan sa tanan.
Viva Sto. Thomas De Villanueva!