Usa sa mga makamatay nga sakit mao ang sakit sa kidney, ug dili exempted niini ang mga Pilipino tungod sa diet niini, pun-an pa sa bisyo ug uban pang rason.
Matud pa sa uban, kun ang kidney na gani maoy maapektahan, inihap nalang gyud ang mga katuigan ug mga bulan sa mga Pilipinong maigo niini, apan sagad sa rason dili ang grabeng kadaut na nahiaguman sa kidney kondili ang kawala nay paglaum nga mamaayo pa.
Kini tungod kay pwerteng mahala sa pagpatambal aning sakit sa kidney ilabi na kun kini maglambigit na og dialysis.
Ang dialysis usa ka medical procedure para sa mga pasyenteng nipalyar na ang kidney o dili na makabuhat sa trabaho niining pagsala sa mga toxins nga nakuha gikan sa mga pagkaon.
Ang kidney maoy nagsilbing salaan sa lawas sa tawo, kun kini maguba dili na masala ang tanang kinaon ug giinom niini ug kini makahilo na sa tawo.
Kun guba na ang kidney mapuno sa toxins ang dugo ug kini maayo sa lawas sa pasyente. Kun himsog ug maayo ang kidney, 24/7 niining salaon ang tanang mosulod sa lawas sa tawo, malimpyohan sa kidney ang dugo nga magtuyok-tuyok tibuok lawas.
Ang dialysis maoy alternatibong paagi aron malimpyo ang dugo, apan pwerteng mahala ug sagad sa dialysis centers naa lamang sa mga pribadong klinika o mga hospital.
Taginting nga linibo ka pesos ang bayad matag session. Kinahanglang dili momenus kaduha matag semana ang dialysis kun gustohon pa gyung mabuhi sa pasyente. Sa mga adunahan ug abunda og kwarta masumpayan pa ilang kinabuhi.
Apan sa mga kabus nga walay ikabayad, swerte nalang kun makapa dialysis og kausa sa usa ka semana ug magbantay na og maayo sa ilang kaonon ug imnon, mao nga sagad sa mga kabus nga pasyenteng nag-dialysis pwerteng yagpisa ug nanglagom ang pamanit.
Apan sa mga adunahang mga nasud sama sa Amerika, ang dialysis centers daghan ug libre. Mao nga bisan kadtong grabe na og kahimtang ang kidneys, masumpayan pa gihapon ang kinabuhi ug normal gihapon nga nanarbaho.
Gikinahanglan gyud sa gobiyerno nga pun-an kining mga dialysis centers bisan sa matag distrito lang, kinahanglan dunay usa o duh aka libreng dialysis centers para sa mga kabus.