Libreng edukasyon sa kolehiyo

Gidipensahan ni Prospero de Vera III, chairman sa Commisson on Higher Education, ang programang libreng edukasyon sa kolehiyo. Kini human gihulagway ni Finance Secretary Benjamin Diokno nga ang nahisgotang programa nga dili epektibo ug nag usik-usik lamang sa salapi sa gobiyerno. Gusto usab ni Diokno nga i-filter ang libreng edukasyon pinaagi sa eksaminasyon nga himoon lukop nasud.

Gipasabot ni Chairman de Vera III nga ang libreng edukasyon dili pag-usik-usik sa salapi sa gobiyerno tungod kay nakatabang kini sa mga kabus nga pamilya nga makapaeskwela sa ilang mga anak sa universidad ug kolehiyo.

Dugang pa ni de Vera nga ang gisugyot ni Diokno nga eksaminasyon lukop nasud isip basihanan sa makapahimulos sa libreng edukasyon sa kolehiyo sama sa gihimo sa University of the Philippines College Admission Test (UPCAT) usa ka disastrous tungod kay maghatag lang kini og pabor sa mga adunahan nga adunay salapi nga magasto sa pagpa-review sa ilang mga anak ug niadtong mga nag-eskwela sa mga pribado nga tunghaan. Dili kini patas sa mga kabus nga mga tinunan nga gamay lang o wala gayod financial nga resources.

Ang libreng edukasyon sa kolehiyo usa ka maayong programa nga angayang suportahan tungod kay naghatag kini og kahigayonan sa mga kabus nga makatungtong sa kolehiyo ug makagradwar sa gusto nilang kurso.

Ang edukasyon investment kini para sa kahibawo ug sa umaabot busa dili kini matawag nga pag-usik-usik sa salapi sa gobiyerno. Ang pag-invest para sa edukasyon dili pag-usik-usik sa salapi bisan og moundang pa ang estudyante tungod kay ang kahibawo nga iyang nakat-onan iya na kini ug dili na kini makuha. Kun dili man epektibo ang libreng edukasyon dili solusyon ang paglimit niini sa mga makabenepisyo kun dili ang pag usab o pagpataas pa sa paagi hinuon niini.

Sa akong pagpanukiduki moabot sa 24 ka mga nasud ang nagtanyag og libreng edukasyon sa kolehiyo. Kun nahimo kini sa maong mga nasud, nganong kwestiyonon pa man ug limitahan ang makapahimulos niini dinhi sa nasud?

Tungod ba sa budget? Nganong dili man gastoon alang sa lbreng edukasyon sa kolehiyo ang budget nga tukbon sa mga buaya? Tungod ba kay apil sila? Nangutana ra.

* * *

Happy Birthday sa kaluha Hennah and Hannah Auxilio.