Ayaw na’g lawgawa

Tambag nako sa kaparyentehan ni Rhea Mae Tocmo nga klarohon unta usa nila’g maayo sa dili pa sila mopagawas og mga pamahayag nga nagduda sila sa resulta sa imbestigasyon sa kapolisan kabahin sa pagpatay sa biktima.

Si Rhea Mae mao kadtong 19-anyos nga babaye nga gipatay ug ang lawas gisu’d og karton, dayon gilabay didto sa kasagbotan sa Barangay Tisa, Cebu City ug napalgan kaniadtong buntag sa miaging Hulyo 17. 

Nakabasa man gud ko nga ang igsuon ni Rhea Mae miingon nga buhi pa kuno si Rhea Mae mga alas 11 sa gabii kaniadtong Hulyo 16, sukwahi sa pamahayag sa kapolisan nga buntag pa nga gipatay ang biktima ni Simeon Gabutero.

Ang igsuon ni Rhea Mae mipakita og mga text message gikan kuno sa biktima nga mora’g kaniadtong gabii sa Hulyo 16, gidala kuno siya sa usa ka bodega, ug gikuyawan siya sa iyang sitwasyon. Kon tuohan nimo ang gibutyag sa igsuon ni Rhea Mae, mora’g malawgaw na sab ang resulta sa imbestigasyon sa kapolisan. Mora ba og dili gyud sila motoo nga si Simeon Gabutero maoy mipatay kang Rhea Mae.

Ang akong ikasulti, susiha usa kon wa ba masayop ang petsa nga gi-encode ninyo sa cellphone nga giingong giteksan ni Rhea Mae. Alang sa mga wa mahibawo, kon unsay petsa nga ma-encode sa cellphone, mao sab na ang matala nga petsa pagkadawat sa message.

Apan sigurado ko nga ang telecommunications company nga maoy tag-iya sa simpack nga gigamit ni Rhea Mae, kon tinuod man nga gikan kaniya ang text message, makahatag og tukma nga petsa sa pagpadala sa message.

Anugonan man gud ko nga pwerteng nindota sa imbestigasyon sa kapolisan aron mailhan si Simeon Gabutero nga maoy mipatay kang Rhea Mae, unya malawgaw lang. Gani, si Gabutero miangkon na nga siya ang nagpatay.

Ang manghud ni Simeon nga 15-anyos, miangkon na sab nga sila kadtong nakita sa CCTV nga nagsakay og motor ug nagkarga sa karton nga gisudlan sa patay’ng lawas ni Rhea Mae mga alas 10 sa gabii kaniadtong Hulyo 16.

Giangkon ni Gabutero nga buntag pa sa Hulyo 16 nga gipatay niya si Rhea Mae, ug gisu’d dayon niya’g karton, dayon sa pagkagabii na nila gilabay sa Tisa.

Ang paglabay nila sa lawas ni Rhea Mae nakuhaan gyud og mga CCTV footages gikan pa sa Banawa, Guadalupe hangtud na sa Barangay Tisa. Pagbalik nila ni Simeon Gabutero gikan sa Tisa, pauli na sa Banawa, nakita usab nga wan a sila’y dala nga karton. Para kanako, hilabihan ka lig-on sa ebidensya ug dili na kini angay’ng lawgawon pa.