EDITORYAL - Personal nga seguridad

Makaalarma na kining sagunson nga mga krimen nga diin ang mga biktima mga kababayen-an, mas makapabalaka pa gyud kay ang uban sa mga biktima mga dalagita pa.

Ning bag-ohay lang sa siyudad sa Toledo, dunay 17 anyos nga tinun-ang dalagita ang gipatay ug gituohang gilugos. Nahitabo kini pipila lamang ka metros gikan sa ilang panimalay.

Ang lugar diin nakita iyang lawas naa ra gyud sa kilid sa dalan sa may kimba niini. Makaluluoy ang biktima tungod kay bisan sa kaduol sa ilang panimalay nabuhat gihapon sa gitumbok nga kriminal ang linoog nga krimen.

Ang suspek, ilaha rang silingan. Ingon niana kapeligro. Bisan silingan dili na kakumpiyansahan karon tungod kay mangita ra og benta aron magbuhat og krimen.

Unsa may mahimo sa katilingban aron masanta ang sama niini nga mga krimen? Kooperasyon sa tanan kay dili tanan mabantayan sa mga polis.

Ang personal nga seguridad naa sa kaugalingon ug kini makat-onan tanan gikan sa panimalay.  Kinahanglang tudloan sa mga ginikanan ang ilang mga anak nga mag-amping kanunay sa tanang oras, bisan asa pa sila moadto.

Kinahanglang masayod ang kabataan, ilabi na ang mga kababayen-an kabahin sa ilang personal nga seguridad.  Dapat makahibalo ang mga bata nga maglikay nga dili mabutang sa mga sitwasyong dili na nila makontrol o mapugngan.

Tudloan silang mobasa o moanalisar sa sitwasyon ug isentro niini ang ilang seguridad.

Sa pikas bahin, dako og papel ang barangay, bisan sa mga hilit nga dapit aron mabantayan ang ilang mga konstituwente.

Pagpatrolya o pagbutang og mga barangay tanod outpost sa mga lugar nga kahibalo silang bisan hilit dunay mga tawong magkanunayan.

Ilabi na ang pagpangita og paagi aron mabutangan og mga sugang dagitab ang mga ngitngit nga mga dalan alang sa seguridad sa tanan. Kung walay budget, mahimong magpatabang sa ilang mayor o ba kaha sa ubang pwedeng makatabang kanila.